98/2025-2026

Dated Kolasib the 8th April 2025: Vawiin tlai khan Pangbalkawn, Kolasib a Om Om Modern Rice Mill ah sawrkarin  Mizoram Buh thar a lei khawm na hmun, buhherna (Rice Mill) chu Pu B Lalchhanzova, Food Civil Supplies and Consumer Affairs Minister in a tlawh.

He hunah hian Pu B Lalchhanzova, FCS&CA Minister chuan Mizoram sawrkar chuan state pawn atangin thla tin buhfai quintal thahnem tak a lakluh thin thu sawiin, heng lakluhna atan hian sum tamtak state pawnah a kal chhuak thin a ni, a ti. Heng zawng zawng te ngaihtuah in leh kan loneituten an buh tharchhuahte atanga hamthatna tha zawk an neih theih nan sawrkar chuan paddy and rice procurement committee din in, Mizoram tharchhuah buh leikhawm chu nikum , 2024 December atang khan  Kolasib Pangbalkawna Om Om rice mill atangin a kalpui tan ta a ni, a ti.

Minister chuan FCS&CA chu a leikhawmtu annih angin buhhum lakhhawm leh a tul dang , leikhawm theih tura buaipui ngaite buaipui tu Agriculture Department nena an thawhhona chu lawmawm a tih thu a sawi a.  Sawrkar chuan Mizoram ina buh a kan intodelh theih nan te, kum tina kan buaipui thin monsoon stock hnianghnar taka a awm theih nan te leh kan loneituten an tharchhuahte awlsam zawka an tihral theih nan kawng hrang hrangin ruahmanna a siam mek a ni, a ti. 

December ni 19,2024 atanga vawiin thlenga Sawrkar in Buhhum a lei tawh chu Quintal 1472.80 a nih thu sawiin,  heihi cheng Rs. 4,418,400 man hu niin, Sawrkarin a tum ber chu farmer ten incentive dawng tha se, sawrkar sum senso a tam deuh anih pawhin  nakin zelah Mizoram ina buh a kan intodelhna atana pawimawh tak a nih dawn avangin sawrkar chu a inhuam a ni, a ti bawk.

 Pi Teresy Vanlalhruaii, MCS, Secretary, Food, Civil Supplies & Consumer Affairs  pawh in thu sawiin, sawrkarin kut hnathawktute tharchuah ngei buh a lei thei chu a lawmawm a tih thu a sawi a. Hetianga Sawrkar in Minimum Support Price a a lei hian loneitute pawh phurna thar a pek a rin thu sawiin, hei aia tam zawk buh her tur  thar chhuah an neih belh zel a beisei a ni, a ti.

Pu Joseph Lalnuntluanga, DAO Kolasib in report a pek danin Buhhum hi a tlangpuiin loneituten an lo kenkhawm hi nilaini an check thin a, ningani ah leikhawm in  zirtawpni ah document tihfel thin a ni a, a karleh ah payment an tifel thin a ni. He rice mill hawn anih atang hian sawrkar hian vawiin ni thleng hian tum 10 a lei tawh a ni.

Pi Runremsangi, Om Om Modern Rice Mill neitu in technical report  pe in Rice Mill chu kum 2017 ah din tan niin kum 2022 march 17 ah hawn a nih thu a sawi a. Tun dinhmunah chuan duhthusam a buhher tur hi an hmuh loh avangin Fair Average Quantity ang pawh a kalpui lovin, an hmuh ang ang an her thu a sawi a, hun lokal zel ah buh her tur tam tham zawk a awm chhoh zel beisei a ni, a ti.

Mizoram Buh thar lei hi Banakaih Policy hnuaia Mizoram sawrkar in phai lam atanga buhfai an chawk luh thin tihtlem na tur leh loneituten an lo tangkaipui zawkna tura Mizoram loneitute tharchhuah buhhum a leisakna a ni a. Kolasib leh Mamit District chu Pilot Project atana puangin heng buh te hi khaw hrang hrangah mimal emaw, FPO emaw FPC emaw Society dang kaltlangin an phurkhawm thei a, an phurkhawmna rate erawh anmahni inbiakremna a ni anga, Sawrkar chuan Kg ah Cheng 30 zelin a leisak thin a ni.

Vawiina Minister ina buh herna hmun a tlawhna hunah hian  Pi Teresy Vanlalhruaii, MCS, Secretary, Food, Civil Supplies & Consumer Affairs , Pu Lalhmunsanga Hnamte, MCS, Addl Secretary, Food, Civil Supplies & Consumer Affairs, Pu David H Lalthangliana, SP Kolasib, Pi B Malsawmtluangi, Addl DC Kolasib leh Food and Civil Supplies leh Agriculture Department hotute leh Party aiawh ten Minister hi an tawiawm a ni.