Vawiin khan Lunglei Additional DC Pu Benjamin Lalzama kaihhruaina hnuaiah Damdawi In leh Clinic ten Registration felfai tak an neih theihna tura hmalakna ‘Lunglei District Registering Authority’ ten meeting an nei. He hunah hian a kaihhnawih sawrkar department hotute bakah Joint VC President a tel.

He hunah hian Clinical Establishment (Registration & Regulation) Act, 2010 in a phut angin Damdawi In leh Clinic ten Registration an neih theuh a tul thu sawiho a ni a. Lunglei District huamchhung ah Clinic registration la nei lo an awm bakah Registration thi tawh an awm nual avangin hemi kawnga hmalak zel dan tur sawiho a ni a. Meeting kaihruatu Pu Benjamin Lalzama chuan  Clinical Establishment (Registration & Regulation) Act, 2010 chungchang chu mipuite hnenah a zau zawka inzirtir leh inhrilhhriat tha a tih thu tarlangin Workshop leh Sensitization program te buatsaih thuai ni se tih Committee chuan a rel a ni.   

Clinical Establishment (Registration & Regulation) Act 2010 hi Gazette of India-ah August 19, 2010 khan tihchhuah a ni a. Mizoram pawhin he Dan hi bawhzui ve nghalin Mizoram Clinical Establishment (Registration and Regulation) Rules, 2014 chu Mizoram Gazette ah June ni 6, 2014 khan a tichhuak a ni.