1999/2022-2023
Lunglei the 20th September' 2022: Lunglei Road Protection Squad (Team No.1) te chuan an Leader Pi Melody Ngurthantluangi, SDO (Sadar), Lunglei hovin vawiin khan Pukpui, Zotlang, Serkawn, Zohnuai, Bazar Veng leh College Veng khawchhung kawngpui endikna an nei.

Inspection-ah hian kawngpui nek chep zawnga insakna bungrua leh bungraw hrang hrang dahte bakah lirthei chhia dah te endikna neih a ni. Vantlang tana hnawk leh kawngpui dal zawnga insakna bungrua dah te leh kawngpui ti chhe thei zawng a hnathawkte hnenah hun bituk pek chhunga senghawi tura hriattirna pek an ni. In sa lai mek te in sakna bungrua dah phalna sorkar atanga la lote chu Urban Development & Poverty Alleviation Department (UD&PA) Lunglei hnenah phalna la tura hriattir an ni. Kawngpui / kawngsir a motor chhia dah thin te chu hmundanga dah sawn tura hriattir an ni a. Chhun lamah kawng dung a lo thawl zawk nan motor park na nei si kawngpui dung/sir a motor park thin te pawhin an garage ah park tura hriattir an ni a, hmun chep laia motor park thin te pawhin hmun remchang zawk dap tura tih an ni bawk. Footpath a mipui kalna dal zawnga insakna bungrua leh thildang dah thin te pawh dahna dang ngaihtuah tura tih an ni.

Road Protection Squad te hi khawtlang hruaitu VC ten tawiawm in an veng chhung kawngpui dinhmun leh an ngaihmawh zawng te lo thlen in a hmunah kal in an enfiahpui nghal a ni. Vawiin a kawngpui dunga insakna bungrua dah leh Motor chhia dah mi 9 (pakua) te hnenah hun bituk chhung a senghawi turin notice pek an ni. Road Protection Squad ah DC, SP, PHED, PWD, P&E, UD&PA, Land Revenue & Settlement, DTO, I&PR Department te bakah VCP Serkawn leh YMA Sub-Hqrs te an tel a ni.