2725/2022-2023
Lunglei the 18th November' 2022: Vawiin chawhnu khan Lunglei District Secondary School Sports, 2022 ni 15-18 November, 2022 chhung Lena Stadium, Serkawn a neih chu kharna hun hman a ni. Dr. K.Pachhunga, Vice Chairman Bamboo Development Board chuan khuallian niin a hmanpui.
He hun hi Pu H. Lalramnghaka, Vice Chairman, District Organising Committee chuan kaihruaiin khuallian Dr. K. Pachhunga chuan engnge in nih dawn a hriat lova, ram hruaitu, Officer, sumdawng hausa in ni thei a, chumi tur chuan tum nei ran a kal a nitin hun tha tak hmang a mi hlawhtling ni turin a fuih a. Awmze nei lova awm mai mai lovin mi tih theih loh tih tum tlat te hi mi hlawhtling an ni thin a ni a ti. Khawvel ah zirna a changkang a phone atangin saptawng a zirtheih a, mahse library leh lehkhabu ah te thiamna a awm a ni a ti a. Thawhrimna leh taimakna nen a hrehawm paltlang a ngai a, Mizo te mamawh ber chu tih tak zet a tih hi a ni a ti bawk. Social media khawih tam lovin mahni hna ah theihtawp chhuah turin zirlai te a chah a, tumah ngaisang lo mihring hi an hlawhtling ngai lova, chuvangin zirtirtute ngaisang turin a chah a ni. Sualna tinreng pumpelh a mahni hna theuh rinawm tak a ti turin a chah a. Taksa hrisel nan infiamna lam ah hma la turin zirlaite a fuih bawk a ni.
Lunglei District Secondary School Sports 2022 ah hian school 16 tel in sports discipline 5- Football, Volleyball, Table Tennis, Badminton leh Athletics ah inelna neih a ni, a pumpui ah Govt. Bazar High School chu titha ber an ni. Best Boy ah Henry Lalmalsawma, Vanhe High School (GIA) niin Best Girl ah Ramnunpuii, Govt. Pukpui High School a ni.
