District Legal Service Authority, Lunglei District Committee chuan vawihin chawhma dar 10:30 khan Lunglei Chief Judicial Magistrate Office Chamber ah meeting an nei.

Vawiin meeting ah hian pawngsual tuar mi 3 leh misual kut tuar a thi ta mi pakhat te tan compensation pek tur chung chang an rel a. Mizoram sawrkar in ruahmanna alo siam tak ‘The Mizoram Victims of Crimes Compensation Scheme, 2011” hmangin pawngsual tawk te, misual kut a thi te bakah misual te kut thlak vanga ramtuileilo a awm ta te tan compensation hi pek theih a ni a. Tunah hian Lunglei District ah hetiang ang a compensation dilte hi mi 4 an awm mek a ni. Sawrkar ruahman ang chuan pawngsual tawktuin cheng singnga an dawng thei a, tin misual kuta thi chhung te pawhin cheng nuai khat an dawng thei a ni. Heng bakah hian misual kut thlak a vanga miin a mit pakhat emaw, a beng pakhat emaw, a ban pakhat emaw, a ke lehlam emaw a hloh a nih chuan compensation atan cheng singnga an dawng thei dawn bawk a ni.

Vawiin a DLSA Committee thukhawm hian heng mi pathum te tana compensation pek tur chung chang uluk taka an rel hnuah an dilna hi pawm tlak niin a ngai a, an tan hian compensation chu an phu tawk ang theuh pek ni se, tiin an rel a ni. Hetiang lam hawi a compensation diltur te chuan District Legal Authority ah dilna thehluh tur a ni.

DSLA Committee ah hian Chairman chu District & Sessions Judge, Lunglei niin Member Secretary ah Chief Judicial Magistrate, Lunglei a ni. Deputy Commissioner, Lunglei District leh Superintendent of Police, Lunglei District te chu Ex-Officio member an ni a. Tin, President, Sub Hqrs. YMA Lunglei leh President, Sub.Hqrs. MHIP, Lunglei chu nominated member an ni.