No.251/2020-2021

COVID-19 avanga inkharkhip laia Lunglei District chhung, a bik takin thlai tharlam hmuh zung zung tur a awm lohna Lunglei khawpui chhunga mipuite thlai thar mamawh pe chhuak tura a lak khawm leh sem chhuah buaipuitu District Supply Chain chu tluang taka kalpui zel a ni.

District Supply Chain Committee Member Secretary Lunglei DHO Pu L.Lalhmingmawia Pachuau chuan hemi kawnga an hmalakna tlangpui sawifiahin Lunglei District huamchhunga khaw 29 - Tuipui D, Thawizawl, Tlawng, Zawlpui,Tuisenchhuah etc atangin thlai chi hrang hrang 40 chuang Lunglei khawpui leh a chhehvela sem chhuah turin lakkhawm mek zel anih thu a tarlang a. He hmalakna  hi 28th March, 2020 atanga kalpui tan niin tun dinhmunah thlai thar trip 43 lak luh tawh niin heng thlai tharte hi a zavaiin cheng nuai 22.4 man hu a chhut a ni a. Heng zingah hian a tam tham a lakluh te chu Zikhlum 190.75 quintals, Bakbawn 95.25 quintals, Tomato 30 quintals, Antam tel 10,500, thingthupui tel 4000 leh maian tel 2400 te an ni. Lunglei leh a chhehvel mipuiten he hmalakna hi an hlut hle a, thlai lakluh te hi hralh zawh vek zel ala ni. 

 Tin, tunlai hi lo, leipui leh chuktuah huana thlai chin hun lai a ni a. Inkharkhip vanga thlai chi lei theilo ten thlai chi an lei theihnan nimin 09/04/2020 (Thursday) khan Horticulture Sales Emporium, DHO Office, Lungleiah kuthnathawktute thlai chi hrang 28 chi zawrh chhuah sak an ni a, cheng nuai khat sing thum sang hnih (Rs.1,32 000/-) man hu lai thlai chi hralh chhuah a ni bawk.

Tin, nimin vek khan District Supply Chain Committee ruahmanna in Siaha District-a Noaotla-III( KM-10) khua a Strawberry chingtu kuthnathawktute tharchhuah chu Horticulture Department Refigerated Van in Lungleiah Strawberry packet 350 (1.16qtls approx)  rawn phurh luh niin naktuk hian zawrh chhuah tum a ni.  

District supply chain hnuaiah hian inkharkhip chhung pawha Lunglei District mipuiten nitin khawsak nana an mamawh thil hrang hrang bakah, chaw tha mamawh ang an hmuh theih nan hma lak a ni a. Kuthnathawktute thei, thlai, thar chhuahte chu a kaihhnawih department te'n mipuite tan an phurh khawmsak thin a, hei hi veng hrang hranga task force-te kal tlangin hralh chhuah thin a ni.