No.4073/2021-2022
Aizawl, the 22nd February 2022: Election Commission of India hnuaia Flagship Program election kaihhnawih thil pawimawhte mipui zirtirna leh vote thlak pawimawh zia inzirtirna ‘Systematic Voters’ Education and Electoral Participation (SVEEP)’ Lunglei District-a kalpui zel dan tur ngaihtuahin vawiin khan Lunglei DC Conference Hall ah District SVEEP Core Committee-te an thukhawm. Meeting-hi Lunglei DC & DEO Pu Kulothungan A in a kaihruai a ni.

Lunglei DC & DEO Pu Kulothungan A chuan democracy hrisel tak kan neih theihnan khua leh tui vote nei thei chin te chu electoral roll a kan inziahluh veka, a hun a thlena vote kan thlak theuh a pawimawh a ni tiin Lunglei District-ah SVEEP hmalakna chak taka kalpui zel anih theihnan member-te theihtawp chhuah theuh turin a sawm a ni. Election chungchang zirlaite zirtirna Electoral Literacy Club (ELC) chu Lunglei District huamchhunga School leh college hrang hranga din tura hmalak mek anih thu pawh sawiin nimin khan Lunglei DEO leh College Principal te hemi chungchangah meeting hlawhtling tak a neih pui thu Lunglei DC chuan a sawi bawk a ni.

Meeting chuan Lunglei District SVEEP Icon atan Lunglei tleirawl zaithiam Stacy Punte sawm ni se tih an rel a. Hemi bakah hian SVEEP hnuaia hmalakna hrang hrang – cycle rally, slogan inziahsiak, poster making competition, futsal tournament, social media campaign leh awareness campaign hrang hrang kalpui dan tur rel ho a ni.