No.4072/2021-2022

Aizawl, the 22nd February 2022: Vawiin khan ramchhung hmun dangte rualin Innovation Facility Centre Auditorium, MINECO, Aizawl-ah ‘Vigyan Sarvatra Pujyate’ (Science Week Festival) hman tan a ni.

Science Week Festival hawnna hun Pu Samuel Lalmalsawma, Senior Scientific Officer, MISTIC kaihhruaiah Professor R. Lalthantluanga, Former Vice-Chancellor, Mizoram University chuan ‘From the Annals of History of Science’ tih thupui hmangin Mizoram-a Science than chhoh dan leh sulsutute chanchin a sawi a. He Festival-ah hian Zopa tualchher kut themthiamna neiten an kutchhuak hmuhnawm tak takte an phochhuak a; Mizoram Remote Sensing Application Center (MIRSAC) ten Space technology leh an khawl neihte an phochhuah bakah Govt. Mizo High School leh Atal Tinkering Lab, Aizawl te an inphochhuak bawk a ni. He Festival-ah hian Science & Technology lama mithiam sawm bikten thu ngaihnawm tak tak sawina hun an neidawn a ni.

‘Vigyan Sarvatra Pujyate’ hawnna inkhawmah hian Dr. Davy Lalruatliana, Scientific Officer, MISTIC hnen atangin Report ngaihthlak a ni a. Sawrkar laipui hnuaia peng hrang hrang - Ministry of Culture, Vigyan Prasar, Department of Science & Technology leh sorkar laipuia Principal Scientific Adviser te tangkawpa huaihawt niin India ramin zalenna neia hmasawnna rahbi a rah kum 75-na hriatrengna puala hun hman thin ‘Azadi ka Amrit Mahotsav’ hnuaia peng pakhat a ni. Pu K. Lalrammuana, Principal Scientific Officer, Directorate of Science & Technology chuan lawmthu sawiin hawnna inkhawm a khar a ni.