Vawiin chawhnu khan Lunglei DC Pu Ashish Madhaorao More hovin DC’s Conference Hall-ah Lunglei District huamchhungah ‘Swachh Bharat Mission (Gramin)’ kalpui dan tur sawihona neih a ni a. ‘Swachh Bharat’ hlawhtling taka kalpui a nih theih nana thawkho tur sorkar department te leh NGO aiawhte he meeting-ah hian an tel.

Lunglei DC Pu Ashish More chuan ‘Swachh Bharat Mission’ hi India Hnam Pa Mahatma Gandhi piancham vawi 150-na pualin neih tan a ni a, a tum ber chu ramchhung zawng zawng faina leh hriselna lamah tihmasawn a ni tiin thuhma a sawi a. Kum 2019 chhung ngeiin India ram chu ram fai ber leh hrisel bera siam tum a nih avangin mitinte thawhhona tha a pawimawh takzet dawn a ni, a ti.

UD&PA Director Pu Zorammuana pawhin thusawiin Swachh Bharat hi chi hniha then a ni a, Urban Area (khawpui chhung) chu UD&PA Department-in a enkawl ang a, Rural Area (thingtlang lam) chu PHE Department hnuaiah an awm thung ang, a ti a. Khawlai fai ringawt hi thianghlimna a ni lova, rilru leh thinlung fai atanga tan a ngai a, chuvangin mipuite chu faina, thianghlimna leh hriselna lamah zirtir leh kaihhruai a tul hle a ni, a ti bawk.