Nimin chawhnu khan Lunglei DC Conference Hall-ah Pi Lalzarmawii, IAS, Deputy Commissioner leh Chairperson ni bawk kaihhruaiin Lunglei District Swachh Bharat Mission (Gramin) Committee chu an thukhawm.

Er. J. Kapkima, EE, Rural Watsan Division, Lunglei leh Lunglei District Swachh Bharat Mission (Gramin) Member Secretary ni bawk chuan kum 2018 leh 2019 chhung hian Lunglei District chu Open Defecation Free (ODF)-a puang thei turin hma lak mek a nih thu a sawi a. Kum 2012-a base line survey atangin Lunglei District-ah In 23676  zingah, ekin neilo In 8036 an la awm thu a sawi a ni. Mimal inthiarna siam tura central leh state atanga sum hmuh leh hmana nih dan te a tarlang nghal a ni.

Meeting-ah hian Lunglei leh Hnahthial RD Block te chu ODF-a puan an nih theih nan, individual household latrine (IHHL) leh thildangah ngaihpawimawh hmasak nise an ti a. Pawna inthiar thinte an inthiar tawh loh nan Deputy Commissioner-in khapna thupek chhuah se an ti a ni. Khaw thenkhata individual household latrine siam nana bungrua hman bang te chu indaihlo awmna nen inremsiam nise an ti a. ODF ni turin awareness campaign buatsaih a, hoarding board leh pamphlet te sem nise an ti bawk.