Nimin chawhnu khan Lunglei District Task Force for Immunization chu DC Office Chamber-ah Additional DC Pu David Liansanglura Pachuau kaihhruaiin an thukhawm. Meeting-ah hian a kaihhnawih sawrkar department hrang hrang hotute, tlawmngai pawl aiawhte leh khawtlang hruaitute an tel a ni.

Lunglei District Immunization Officer leh SMO ni bawk Dr Lalrinthangi chuan Universal Immunization Program hnuaia Lunglei District hmalakna te sawilangin 2017 – 18 (April – March) achievement chu 67% niin 2018-19 (April – March) achievement 72% ah a chhoh thu a tarlang a. Zenghri danna Oral poliovirus vaccines (OPV) pek chhuah chungchang pawh sawiin Lunglei District population mi 1,62,451 zinga mi 14,075 te chu kum nga hnuai lam OPV pek ngai te an ni a. OPV 1st Round, 2019 ah naupang 14,042 te OPV pek tawh niin chievement hi 99.8% a ni. Health Department –in vaccine dang chi hrang hrang a pek chhuah mek Routine Immunization-ah damdawi thar pek chhuah tum a ni a. Hei hi naupang kawthalo natna thlen tu tam ber inkaichhawn awl em em  Rotavirus natna laka invenna Rotavirus Vaccine a ni. Rota virus vaccine hi Routine immunization ( A nawlpuia vaccine pek thin) zingah khawvel ram 96 ten an telh tawh a. He vaccine hi World Health Organization (WHO) position paper-in him tawkah a puan tawh thu tarlan a ni bawk.

Health and Family Welfare Department hotute hian an hnathawhna lamah kawng hrang hrang a harsatna an tawh thin te pawh sawilangin Lunglei District khawthlang lam a bik takin Bunghmun chhehvela ah te inkalpawhna leh inbiakpawhna a that tawk loh avanga harsatna an tawh fo thu an sawi a. Tin, vaccine la duh lo te an awm fo avangin harsatna nasa tak an tawk thin bawk a ni. BDO te nen tangkawpa chak zawka hmalak an duh thu an sawi a ni.