Vawiin chawhnu khan Lunglei District Task Force for Immunization Committee chu Lunglei DC Pu K. Lalrohlua kaihhruaiin a pisaah an thukhawm a. Lunglei District-a Mission Indradhanush Phase 4, Round 1 neih dan thlirletna leh Phase 4 Round 2 kalpui tura hmachhawpte sawihona an nei.

Pu K. Lalrohlua chuan health department te hmalakna chu fakin, Phase 4 Round 2 hlawtling taka zawh a nih theih nan a thawktu deparment bakah mipui hnek hnai department te kan tanrual a ngai a ni, a ti a. Phase 4-ah Round 3 leh 4 neih a ngaih loh nan tan la thar turin member-te a sawm nghal a ni.

District Immunisation Officer Dr. Lalawmpuia Chhangte chuan Phase 4 Round 1 February ni 7, 2017-a neih zawh tak chu report pein, Phase 4 Round 2 March ni 7, 2017 atanga kalpui leh tura an inbuatsaih dan te a tarlang a. He Round-a an tum te an tih hlawtlin chuan Regular Immunisation-a an luh chhoh theih a beisei thu a sawi a ni.

Bunghmun PHC hnuaia naupang kumhnih hnuailam 41 leh nu nau pai 20 te Phase 4 Round 1 khan vaccine pek tum an ni a, mahse harsatna hrang hrang avangin 87% leh 60% chauh tih hlawtlin theih a ni. Phase 4 Round 2-ah naupang kumhnih hnuailam 40 leh nu nau pai 16 te vaccine pek tum a ni.

Mission Indradhanush hi December ni 25, 2014 khan hawnna neih niin, Mizoramah pawh April ni 7, 2015 atang khan Lunglei, Mamit, Lawngtlai leh Siaha District-ah te kalpui a ni a. Phase tinah Round 4 awm tura ruahman a ni.