Nimin khan Lunglei District Task Force for Immunization chu DC Office Chamber-ah Lunglei DC Pi K.Lalrinzuali kaihhruaiin an thukhawm. Meeting-ah hian a kaihhnawih sawrkar department hrang hrang hotute, tlawmngai pawl aiawhte leh khawtlang hruaitute an tel a ni.

Lunglei District Immunization Officer leh SMO ni bawk Dr Lalrinthangi chuan Universal Immunization Program hnuaia Lunglei District hmalakna te sawilangin  2017 – 18 (April – March) achievement chu 67% niin 2018-19 (April – March) achievement 72% ah a chhoh thu a tarlang a. Kumin sawrkar kum April 2019 atanga September 2019 thleng khan  Zenghri danna Oral poliovirus vaccines (OPV) chu Lunglei District chhunga naupangte hnenah pek chhuah mek zel niin achievement hi 98.83% a ni a. Health Department-in kumin atanga Routine Immunization-a damdawi thar a pek chhuah naupang kawthalo natna thlen tu tam ber inkaichhawn awl em em Rotavirus natna laka invenna Rotavirus Vaccine (RVV) pawh Lunglei District-ah pek chhuah mek niin August 2019 khan naupang 231 leh September 2019 khan naupang 192 hnenah pek tawh an ni.

Tin, India ram puma naupang kum hnih hnuailam leh nu naupai in hri danna (vaccine) an dawn kim theihna tura hmalakna Intensified Mission Indradhanush Lunglei District tana kalpui chhunzawm zel dan tur pawh sawiho a ni a. He hmalakna hnuaiah hian Bunghmun PHC hnuaiah khaw pali (4), Lungsen PHC hnuaiah khaw pasarih (7) leh Tlabung SDH hnuaiah khaw sawmhnih pathum (23) a zavaiin khaw 35 chhungah naupang kum hnih hnuai lam 242  leh nu nau pai mi 58 te December chhung hian hri danna pek an ni ang.

Health and Family Welfare Department hotute hian an hnathawhna lamah kawng hrang hrang a harsatna an tawh thin te pawh sawilangin Lunglei District khawthlang lam a bik takin Bunghmun chhehvela ah te inkalpawhna leh inbiakpawhna a that tawk loh avanga harsatna an tawh fo thu an sawi a. Tin, vaccine la duh lo te an awm fo avangin harsatna nasa tak an tawk thin bawk a ni. BDO te nen tangkawpa chak zawka hmalak an duh thu an sawi a ni.