Nimin khan Agriculture Department, Lunglei District buatsaihin Lunglei DC Pi K. Lalrinzuali hovin Huisih Zau, Haulawngah khawl (Paddy reaper) hmangin buh seng pui neih a ni. He hunah hian Lunglei Additional DC Pu David Liansanglura Pachuau leh District official dangte, Lunglei DAO Pu Tlangtimawia Zote leh Agriculture Department hnathawkte, Lunglei MJA hruaitute, Haulawng VCP leh khawtlang hruaitu dangte leh helai zau a leilet neitute an tel a ni.

Huisih Zau-a buh seng pui neih pual hian a hmunah inkhawm tawi neih a ni a. He inkhawm DAO Pu Tlangtimawia Zote kaihhruaiah Lunglei DC Pi K.Lalrinzuali chuan kuthnathawktute a ngaihsan thu sawiin kum tluana hah leh taima taka an enkawl an buh leh thlaite a hmunah ngei seng pui theia a awm chu vannei a intih thu a sawi a. Kan ram hmasawnna tur leh kan economy chawikang zel turin kuthnathawktute an pawimawh takzet a ni tiin kuthnathawktute chu taima tak leh phur taka sawrkar hmalaknate tawiawm chhunzawm tur leh sawrkar leh Department-te finchhuah fo turin a chah a. Agriculture Department hnathawktute thawhrimna leh inpekna  fakawm a tih thu pawh sawiin loneitute nena inhriatthiam tawnna boruak tha hnuaiah thanhnemngai taka hnathawk ho zel turin duhskana a hlan a ni.

He hunah hian Pu VL Zidinga Sailo, AEO Haulawng Circle in Technical Report pein Lunglei Sub Division huam chhungah kum hmasa lam aiin tun kum 2019 ah kan tharchhuah a tam zawk ngei beisei a nih thu a tarlang a. Huisih Zau ah hian chhungkaw 15 in 14 hectares ah buh an ching mek a, kuthnathawktute hian taima taka hma la in, Department in uluk takin a vil reng a. Huisih Zau ah hian nikum khan buh 23 MT an thar a, kuminah khum ngei an in beisei a ni. Sawrkar laipui policy Pradhan Mantri Krishi Sinchai Yojana (PMKSY) hnuaiah an hman tur tanky panga (5) buatsaih a ni tawh a. Helai hmun panna Link Road hi 2014 khan Rashtriya Krishi Vikas Yojana (RKVY) Scheme atangin siam that a lo ni tawh bawk a ni.

Nimin vek khan Lunglei DC leh amah zuitute hian Chite Zau pawh tlawhin helaia hmalaknate a hmunah an enfiah a, Farmer Management Committee (FMC) te nen inkawmhona hun an hmang a, an harsatna te a hnenah an lo thlen bawk a ni.