Vawiin chawhnu khan R Dengthuama Hall, Salem vengah 65th National School Games under 17 Boys Boxing 2019 hmawrbawkna hun hman a ni a, Pu Robert Romawia Royte, Minister of State for Sports & Youth Services Department chu khuallian niin Mizoram team ten hnenah Champion Trophy a hlan.

Minister Pu Robert Romawia Royte chuan hlawhtling tak a National School Games Under 17 Boys Boxing 2019 kalpui a ni chu a buatsaihtute leh inelnaa tel zawng zawng te fakawm a tih thu a sawi a, kum dangah pawh Mizoram chuan National School Games a inelna hrang hrang thlengtu nih an huam a ni tih School Games Federation of India a hruaituten hria se a duh thu a sawi bawk a ni. Minister chuan he inelnaa chak te chu lawm thiam tur leh chak lo ten in enletna hun tha nei a, beidawng mai lova hmasawn tum turin a chah a. Sawrkarin infiamna a ngaih pawimawh thu sawiin Sports chu Co-curricular activities atangin Curricular activities a sengluh tur a hmalak a nih thu a sawi bawk a ni. Pu Roberta chuan Mizoram chu state hrisel ber ni turin Sawrkar laipuiin Fit India Movement an kalpui hma thla 5 khan Fit Mizoram movement kalpui a lo nih tawh thu a sawi a, zirlai kalkhawm te chu an hriselna uluk a, an phak tawk a infiamna hrang hranga tel thin turin a chah bawk a ni.

Vawiin 65th National School Games Under 17 Boys Boxing 2019 kharna hun hi Pi Lalzarmawii, IAS, Director, School Education Department in a kaihruaia Pu James Lalrinchhana, Addl Director, Working Committee Chairman ni bawk chuan report pein lawmman semna hun hman a ni bawk a ni.

65th National School Games under 17 Boys Boxing 2019 ah hian Mizoram chuan Gold Medal 5, Silver 2 leh Bronze 2 an la a, point 56 hmuin pakhatna dinhmun an hauh a, Haryana in point 51 hmuin pahnihna dinhmun an hauh a ni. Best Boxer ah Laldinsanga (50Kg), best Refree ah Rupak Raj Duarah leh Best Judge ah Pu Lalfakzuala te thlan an ni bawk.

School Games Federation of India hian kum tinin National School Games hi sports discipline 30 chuangah a buatsaih thin a, kum 12 hnuah School Games hi Mizoramah buatsaih a nih lehna hmasa ber a ni. 65th National School Games, 2019 Boxing (Under 17) Boys ah hian Boxer 407, Team official 68 leh Technical Official mi 39 India state hrang hrang leh Affiliated Unit 36 atangin an lo tel a weight Category 13 ah inelna hi neih a ni.

Attachment

  • Loading attachment...