India rama Japan International Cooperation Agency (JICA) hotu, Chief Representative Pu Katsuo Matsumoto leh a thawhpuiten vawiin khan Chief Minister Pu Zoramthanga chu a pisa ah hmu in Mizorama hmalakna hna thawh belh chungchang an sawi.

JICA hian tuna Bamboo development leh healthcare lama hmalak belh chungchang Chief Minister hi an sawipui a. JICA sum bultum in Cancer Hospital din tura ruahmanna kal mek a ni a. Bamboo development chungchangah JICA chuan India ramah leh a bik takin hmarchhak state ah te zirchianna neiin, nasa zawk a economy chawisang tura hmalak tum a nih thu te leh, chak zawka ram pahnihte an thawhhona turin ruahmanna siam a nih thu an sawi a. Hemi kawngah hian Mizoram Bamboo development atana thawhho dan tur an sawi a ni.

JICA hian ram hrang hrangte ei leh bar hmasawnna turin ki hrang hrangah sum leh thiamna te thawhin a pui thin a. Transportation - kawng, rel kawng, metro leh adangte bakah kawlphetha siamchhuah te, agriculture lam leh healthcare lamahte India ramah hma an la tawh a ni. Tun dinhmunah JICA chuan Irrigation and Water Resources Department kaltlangin Mizorama buh tam zawka thar a intodelh turin leh hmalakna hna dang an thawh mek a ni.

Vawiin hian JICA hotute hi Irrigation and Water Resources Secretary Er. Valbuanga, leh Chief Engineer Pu Lalrotluanga ten an tawiawm a ni.