1310/2023-2024

Lunglei the 28th July 2023 : Vawiin tlai khan Lunglei District Task Force for Immunization chu chairman Lunglei Bawrhsap Pi Ramdinliani, IAS kaihhruaina in ama office chamber ah Intensified Mission Indradhanush (IMI) 5.0 Vaccine pek dan tur ngaihtuahin thutkhawmna neih a ni.

Thutkhawm na ah hian Naupang kum nga hnuai lam leh Nu naupaite hnena natna hri laka invenlawkna vaccine pek beihpui thlakna Intensified Mission Indradhanush 5.0 chu Lunglei District pumpuia kalpui turin ni 7th August 2023 zing 10:30Am hian DC Conference Hall, Lunglei-ah hawn nise, hemi hnu hian Lungsen PHC, Tlabung SDH, Bunghmun PHC leh Hnahthial CHC a khaw 41 ah vaccine pek beihpui thlak tan nghal nise tih a ni. Ruahman dan chuan vaccine pek beihpui hi thawh thum a neih tum niin ni 7th - 12th August, ni 11st-16th September leh ni 9th-14th October 2023 -ah te neih tum a ni. Vaccine la thei turte dapchhuah mek niin, hmaih awm miah lova vaccine pek anih tur thu sawi a ni.

District Task Force for Immunization (DTFI) tarlan dan chuan tun dinhmunah Lunglei District-ah Naupang vaccine la thei kum hnih hnuailam 230, kum hnih atanga kum 5 chin 136 leh Nu naupai 42 an awm mek. Kum 2022 - 2023 Lunglei District Routine Immunization hmalakna in a tarlan danin Nu naupai lai 2782 leh Naupang 2662 te hnenah vaccine hi pek an ni.

Intensified Mission Indradhanush hi sawrkar laipui hmalaknaa kalpui niin, Mizoram bikah chuan Lunglei ,Champhai, Kolasib, Lawngtlai leh Mamit District-ah te kalpui mek a ni a.