1309/2023-2024

Champhai the 28th July, 2023 – Law & Judicial, Transport, EF&CC te changtu Minister Pu TJ Lalnuntluanga chuan vawiin chawhnu khan Government Champhai College (GCC) Students’ Union Leaders buatsaih Graduation Ceremony, GCC Multipurpose Hall a neih a hmanpui. GCC atang hian Stream pali (BA, BSc, BCA, BCom) atangin zirlai 239 exam in zirlai 176 (73.64%) an pass a. BCA leh BCom Stream ah te 100% pass result an nei a ni.

Minister Pu TJ Lalnuntluanga chuan a college zir chhuahna Government Champhai College (GCC) in hmasawnna tam tak hmu zelin kuminah pawh Undergraduate result tha tak an nei leh thei chu lawmawm tiin Principal, Staff leh zirlaite chu lawmpuina leh duhsakna chibai a buk a. Zirlai pass tharte chu an hun lo kal zel turah hmathlir thui tak nei tura chahin hna thawh hreh nei lo tur leh chhungkua, khawtlang leh ram tana chhawr tlak nih tum turin a chah a. Mizoramah mi hausa leh mi retheite inkar a zau zual zel chu veiawm a tih thu sawiin Minister chuan thalai kalkhawmte chu midang te tan malsawmna ni thei tura taima leh rinawm taka thawk tur leh mi harsa zawkte dinhmun chawikang tu nih tum theuh turin a chah bawk a ni.

A sawi zelnaah Minister chuan “Social Media kan buaipui nasa em em a, thil tha tam tak a awm laiin, tha lo tam tak pawh a awm a, a tha zawng leh tangkai taka hman theih a nih laiin, kan zirlai ti buaitu, kan hlawhtlinna daltu a ni thei tih hria in a hman dan tawk I thiam ang u” a ti a. Social Media kaltlangin kan duh zawng zawng post in, a then chu midang sawiselna leh diriamna te, midang han deusawhna ang chi te leh mimal inhuatna thlen thei ang chi te, heng te a avang hian kan rama remna leh muanna hlu tak kan neih hi a chhe thei a ni tih hriain mitinte I fimkhur tlang ang u, a ti bawk a ni.

Champhai South AC bialtu MLA Pu TJ Lalnuntluanga chuan Champhai District-a zirna sang zawk neih theihna tura hmalak mek a nih thu sawiin Master Degree zirna neih anih theihnan tun hnaiah MZU Vice Chancellor Prof. Dibakar Chandra Deka nen an inkawm thu pawh a sawi a ni.

Pu P. Lalhmingliana, Principal GCC pawhin thu sawiin GCC zirlai pass tharte chu an kal zelnaah mi hman tlak ni ngei tura tan la chhunzawm turin a chah a. GCC in result tha tak a neih theihna tura theihtawp chhuahtu zirlaite, zirtirtute leh thawktu dangte inpekna leh thawhrimna avangin an chungah lawmthu a sawi bawk a ni.

Lalfakawma, 2nd Rank Holder, Computer Science, UG Exam 2023 chuan Valedictory Speech a sawi a ni.

Vawiin GCC Graduation Day ah hian zirlai 176 (BA – 137, BSc – 10, BCA – 9, BCom -20) leh an chhungte an tel a. Zirlai ti tha lawmman chi hrang hrang a hnuaia mi ang hian sem chhuah a ni: