Vawiin khan Lunglei DC leh DEO ni bawk Pu Ashish Madhaorao More, IAS chuan kumina Village Council inthlan tur atana Lunglei District V/C Final Electoral Roll chu DC’s Conference Hall-ah a tlangzarh. He hunah hian Political party hrang hrang aiawhte, NGO aiawhte, Lunglei MJA member te bakah Election officials te an tel a ni.

Vawiina VC Electoral Roll tlangzarh-ah Lunglei District huamchhungah V/C Inthlan turah Main (Single) Polling Station 145 a awm a, Auxilliary leh Multiple Polling Stations a awm lo thung a. A zavaiin In (house) 28226 niin Vote thlak thei zawng zawng mi 97581 (Mipa - 48597, Hmeichhia - 48984) an ni. Kumin inthlan turah hian Village Council Area thar 7 siam a ni a, chung chu : Hmuntlang, Lalnutui, Lunglsen-II, Nunsuri-II, Thangpui, Upper Lungrang ‘S’ leh Zobawk ‘S’te an ni. Village Council elector ngah ber chu Chanmari niin, elector tlemna ber chu Thehlep a ni.

DC/DEO Pu Ashish More chuan VC Inthlan tur chungchang sawizauvin vawiina Electoral Roll tlangzarh a nih rualin ERO teh anmahni bial chhungah pawh mipuite hmuh theih turin Electoral Roll hi an tarchhuak theuh dawn a. Polling Station pakhat-ah elector 1500 chin awm phal a ni a, tuna Electoral Roll-a a landanah chuan Polling Station thenkhat-ah 1500 chuang awmna P/S chu then leh theih a ni a, chuvangin Auxilliary P/S pawh kan nei belh thei tih a sawi a. VC tinah Seat awmzat tur chu LAD lamin an rawn bituk tur a nih thu a sawi bawk.