Vawiin khan Mamit District Village Council inthlana hman tur Final Electoral Roll chu Mamit DC Conference Hall-ah District Election Officer Pu Vanlalngaihsaka’n a tlangzarh.

Tlangzarh inkhawm hi Pu Malsawmtluanga, Election Officer-in kaihruaiin, final roll tlangzarh anih theih nana hnathawh dan te leh Roll tlangzarh a thil langsar zualte a tarlang a. Electoral Roll buaipui chungchanga thawh hona tha an neih avanga lawmthu sawiin District Election Officer chuan inthlan felfai taka buatsaih a nih theih nana tanrualna a awm zel a duh thu a sawi.

Vawiin a tlangzarh tak Electoral Roll a thil langsar zualte: Mamit District chhungah hian Village Council 88 awmin, sub-village 9 a awm a. Village Council a in tamna ber chu Lengpui niin, in 739 a awm
a, Lengpui hi Mamit District huamchhunga rinluh ni tawhlo mahse MLA Constituency, Mamit in a la huama avangin Electoral Roll-ah hian Mamit District chhunga ziahluh an ni. In 56 awmna Parvatui chu In tlem berna a ni a. Vote 2050 awmna Lengpui Village Council chu Vote tam berna niin, Voter 98 awmna Vawngawnzo chu vote tlem berna khua a ni. Mamit District chhunga VC inthlana vote nei zawng zawng chu mipa 25928 leh hmeichhia 25231, an vaiin mi 51159 an ni a. Draft Roll ni 30 January, 2015 tarchhuah atang khan mi 224 paih an ni.

Vawiin Electoral Roll tlangzarh inkhawmah hian NGO hruaitu hrang hrang te, Political Party hrang hrang aiawh te bakah Election Official te an tel a. Thil hriatfiah tawk loh inhrilhfiahna hun hman niin, Draft Roll tlangzarh anih atanga sawisel duh emaw siamthat duh neite tana hun hawn chu a rei tawklo an tih thu kalkhawm te hian an sawi a ni.