Vawiin chawhma khan Lunglei District Volleyball Association President Cup 2019 chu Liandala Mini Sports Complex, Farm Veng Lunglei ah Pu Lawmawma Tochhawng, Vice Chairman, HPC Lunglei chuan khuallian niin a hawng.

Pu Lawmawma Tochhawng chuan Lunglei District Sports lama hmasawnna tura Lunglei District Volleyball Association President in ama sum seng a Tournament a buatsaih avangin lawmthu a sawi a. Mizoram ah Volleyball hi a lar chho tan mek a mipui te en pawh a hlawh hle tawh ani, tun atanga rei lo te ah chuan he game hi eizawnna tlak a tling thuai dawna ni ati. Player te pawh tournament chhung chauh thlir lo turin a duh a, taksa ti fitna piah lamah chhungkua chawmna khawp a thiam tum ang che u ati. Player te Mizoram ringawt a in thatlai hun a khelh tum lovin State leh ram dang a khel tum turin tumruhna nena tan la theuh turin a chah ani. Player hlawhtling tur chuan tumruhna, thawhrimna, insumtheihna leh hotute thuawina a ngaih thu a sawi bawk.

He Tournament ah hian mipa team 6 leh hmeichhia team 3 an tel ani.