No.3368/2020-2020

Vawiin khan Lunglei District Level Task Force on Covid-19 Chairman Deputy Commissioner Pu V. Lalsangliana, IAS kaihhruaiin DLTF member ten Indo-Bangladesh border awmna Tlabung Sub Division tlawhin official-te, VLTF-te leh ramri hrula duty Khawthlangtuipui Group YMA-te nen inkawmhona hun an hmang. Duty-te mamawh tur hrang hrang - medical & disaster response supply - te, silpauline, ORS, damdawi chi hrang hrang leh pawisa fai Rs. 1,20,000 ( Khawthlangtuipui Group YMA hnenah Rs. 80,000. Tlabung area VLTF-te hnenah Rs. 40,000) te a hlan a ni.

DLTF Chairman hi Lunglei atangin DLTF member secretary CMO Dr Thani Pachuau, Sub Hqrs YMA President Pu Lalrotluanga leh official dangten tawiawmin Tlabungah Tlabung SDO(C) Pu Lalsanglura, SMO Dr R. Lalnienga leh official dang - te leh khawtlang hruaitute leh tlawmngai pawl aiawhten Tlabung YMA Run ah an lo hmuak a ni. 

Hemi puala inkhawm tawi neihah Pu V. Lalsangliana chuan Tlabung Sub Division chu Bangladesh ramri hrula awm anih avangin Covid-19 hrileng laka invenna kawngah pawh sawrkarin rang taka hma la in, 10th February, 2020 atang khan Kawrpuichhuah-ah ‘Coronavirus Screening Point’ siam anih thu a sawi a. Tlabung SDO (C) Chairman na hnuaia din Sub Divisional Task Force on Covid-19 te hmalakna kawng hrang hranga lo tawiawma an tha lo ti chaktu  tlawmngai pawl leh khawtlang hruaitute chungah lawmthu a sawi a. Tlabung area VLTF-te leh riahbuk suala ramri a duty YMA leh YCA volunteer-te inpekna leh thawhrimna fakawm a tih thu sawiin , Covid-19 do zel tura kawng engkima hmalak pui chhunzawm ah a sawm a. Ram venhim nana khawtlanga lungrual taka thawhhona awm thin chu lawmawm a tih thu sawiin Bawrhsap chuan Covid-19 chu inkaichhawn awlsam tak anih avangin ramri venhim hnathawktute chu tha thlah lova uluk leh fimkhur taka duty chhunzawm zel turin leh an mamawhte sawrkarah thlen vat thin turin a chah a ni. 

Sub Hqrs YMA President Pu Lalrotluanga pawhin thu sawiin ramri venghima thla hnih chuang riahbuk suala duty mek te Khawthlangtuipui Group YMA-te chu chhuanawm a tih  thu sawiin tha thlah lova thahnemngai taka duty chhunzawm zel turin a fuih a. Kawng engkima SDLTF-te rawn chunga hma la zel turin a chah bawk. 

Khawthlangtuipui Group YMA hnuai–ah hian YMA branch Pali (4) - Tlabung Branch, Zodin Branch, Chawnpui Branch leh Chawilung Branch-te an awm a. 3rd May, 2020 atang khan ramri venghimin an duty tan a. Riahbuk sual zawng zawng hi Khawthlangtuipui Group YMA in hmanrua a ngaihtuah a, mi thil phal te thil pek dawn atangin ei leh in pawh hi YMA leh YCA ah te sem thin a ni. 

Khawthlangtuipui Group YMA te duty dan tlangpui:

(1) Tlabung Branch : Tablabagh ah Rammu in, anni hian YCA te an rammut ve na Bakmera, Hudusora leh Balukiasury cover pahin an awm a. 

(2) Zodin Branch : Nursury -Il ah riahbuk sualin an rammu mek a, Bangladesh, Theka Bazar ah India mi an kai rûk leh rûk loh te, Bangladesh mi an lo kai leh kai loh te an vilveng reng a. Nunsuri-II, VLTF/YCA duty te an tawiawm thin bawk a ni.

(3) Chawnpui Branch : Tiperaghat VIllage Council hnuaia Jaruldubasora khaw bul Border vêngin an rammu a, Bangladesh mi lo kalna tur khân pawimawh tak tak an vêng a ni.

(4) Chawilung Branch : Khojoysuri Vilage Council hnuaia Chondrobighat kalkawng Border fencing Gate No. 13 -14 leh 14 -15 vengin an rammu bawk.

Lunglei DC leh amah zuitute hian Indo-Bangladesh border trade hmalakna hmun tur Kawrpuichhuah an tlawh bakah Tlabung Sub Division Hospital leh Tlabung SDO (C) Office te an tlawh bawk.