No.1732/2020-2021

Lunglei DLTF Chairman Pu V.Lalsangliana chuan Lockdown 5.0 kalpui dan tur SOP zawm theuh turin hriattirna leh ngenna a hnuaia mi ang hian a ti chhuak.

Khawvelin Covid-19 avangin harsatna a tawk a. India ram pawh a nghawng na tual tual a. Mizoram leh Lunglei-ah ngei pawh Covid-19 kai hriatchhuah kan pun chhoh reng lai hian Lockdown 5.0 kalpui dan tur Standard Operating Procedure (SOP) chu Mizoram Sawrkar thuchhuak kalh lovin leh Sawrkar thuchhuak bawhzuiin District Level Task Force chuan District mil tur berin a siam rem a. Mizoram Sawrkar-in thupek leh inkaihhruaina a siamte aia phalzau zawnga District-in emaw khua/veng-in emaw in kaihhruaina  a siam hi a rem lo a ni.

District Level Task Force (DLTF) kaihhruaina hnuaiah Village Level Task Force (VLTF) ten SOP te leh inkaihhruaina hrang hrangte hi an kengkawh thin a. Thawhhona tha tak kan neih zel avangin a lawmawm pawh kan ti hle a ni. Dawr inhawn dan chungchangah hian Aizawl khawpuiah leh District khawpuiah te hmun hulum lai leh dawrkawna dawr indawta awmte inhawn chhawk tura kalpui tur a nih angin Lunglei-ah pawh kalpui a ni a. Venglai huamchhungah VLTF te remruatna anga dawr zawng zawng inhawng zawnga kalpui a ni a. Hei hi kawng tam takah a remchan zawkna a awm theih tho rualin, Mizoram sawrkar thupek leh inkaihhruaina pela kalphung siam leh neih a rem loh avangin Police te leh magistrate te pawhin dawr inhawn hun lova inhawng te ni 5.06.2020 chhunah khan inkhar turin an ngen a. Venglai, Bazar Veng leh Chanmari-a dawr thenkhatte pawhin thuawih takin an inkhar a. An chungah lawmthu kan sawia, Sawrkarin kan him tlanna tura dan a siamte hi zawm hram hram turin kan inngen nawn leh a ni.

Sawrkar tha chakna hmanga dan hi kenkawh theih a nih laiin tunlaia kan boruakah chuan, Lungleiah ngei pawh Covid-19 kai thar kan hriat belh zelna boruakah hi chuan, tharum hmangtea dan kenkawh luih hi tul leh tha berah kan ngai lo a, ram pum leh State te, District leh Village level-ah te tum thuhmun nei a, Sawrkar ruahmanna ang zawm chung zela tangho vek tur kan ni a. Sawrkar-in zawm tur a siam dante hi VLTF tinte pawhin ngai pawimawh turin kan inngen nawn leh a. Inkaihhruaina dan zawm lote hi The Mizoram (Containment and Prevention of Covid-19) Ordinance, 2020 leh Disaster Management Act, 2005 hmangin hrem theih an ni a, hremna lek ngailo tura kan zavai atana tha leh zawm tur dan leh in kaihhruaina te hi zawma, dawrkaite pawhin kan inhawn hunah chauh inhawnga, dan zawm turin kan inngen a. Kan dante tha taka kenkawh a nih theih nan, DLTF chuan a tul angin hma a la zel dawn a, hengte hi mipui zawng zawng tana him leh harsatna lian tawk loa kan kal theihna atan ngai pawimawh turin kan in ngen a ni. 

Mizoram Sawrkar-in Lehkha No. B.13021/101/2020-DMR/Pt.IV Dt.5.6.2020 hmanga Order a chhuah ah chuan Covid-19 laka kan inven dan tur leh hmalak dan tura Sawrkar thupek kalha hmalakna a awm hriat a nih thu leh chutiang ang kalha thupek emaw kalphung siam tur a nihloh thu tarlangin chutiang a awm chuan sut nghal tur a nih thu thupek a chhuah a. He Order-in a sawi angin District pum emaw khua/veng bik atan emaw State Sawrkar-in Order a chhuah ang nilova hmalak tulna riaua awm a nih erawh chuan Deputy Commissioner hnenah chhan leh vang thatak ziakin rawtna thlen theih a ni.