No.2148/2020-2020

Nimin khan Lunglei District Task Force on Covid-19 member-te chu Group 5-ah inthenin Lunglei Town Area-a VLTF 24-te, Community Quarantine Centre (kohhran hall) 21-te leh Sawrkar Quarantine Facility 8-te an tlawh kual a, VLTF-te hmalakna tlangpui sawipuiin Quarantine Facility-a ruahmanna awm te a hmunah kalin an enfiah a, harsatna an neihte an sawipui. Tin, Quarantine mek te ei tura khaw hrang hrang ina thlai leh thei an donate te chu Quarantine Centre-ah te hian an semchhuak nghal a ni. Heng DLTF member thawk chhuak te hian Lunglei DLTF Chairman hnenah report thehlutin VLTF leh Quarantine Centre-te harsatna neih te a tul anga bawhzui nghal a ni.

Covid-19 hrileng mek avanga inkharkhip kalpui mekah Lunglei District mipuite himna tur leh ei leh bar leh an nitin mamawh an tlakchham loh nan District Task Force leh VLTF-te tangkawp chuan theihtawp an chhuah mek zel a.District mipuite tangrual takin mi tlawmngai leh thahnemngai te an rawn pen chhuak mek zel a. Khaw engemawzat in an thlai leh thei thar thahnem tak Quarantine Facility-a awmte ei atan donate mek zelin mimal, pawl leh kohhran atangin tanpuina sumfai, ei bar, leh invenna hmanrua engemawzat dawn tawh a ni bawk a. Tin, Medical lam training chhuak mi 12 te chuan hlawh engmah phut lovin Covid-19 do kawnga tul ang ang thawk tura inhuamin an volunteer a ni.

Lunglei District-ah hian VLTF 129 awmin hengte hi Village Council 113 leh Sub Village 16 an ni a. VLTF tin te hian mahni veng/khuaa chhuanchham awmte an tanpui mek zel a ni. VLTF-te thawhrimna leh inpekna avangin District Task Force chuan an chungah lawmthu sawiin an harsatna neih te DLTF-ah thlen vat thin turin an chah a ni.

Tin, Lunglei ah kohhran 22-te hmunhma chu Community Quarantine Centre-ah hman mek niin tun dinhmunah heng CQC-ah te hian mi 209 (mipa - 74, hmeichhia - 135) an awm mek a ni. Heng CQC-ah te hian VLTF, kohhran hruaitu leh sawrkar ruat official-te duty in an mamawh neihte tha taka ngaihtuah sak zel an ni. An hmunhma phal taka Community Quarantine Centre-a hman tir tu kohhran te chungah Lunglei District Level Task Force on Covid-19 chuan lawmthu a sawi a ni.