Lunglei Town Sanitation Task Force in a lo rel tawh bawhzui nan nimin chawhma khan District Urban Development Office (DUDO), UD&PA Department, Lunglei ah Urban Forest (Green Space) chungchang ah meeting neih a ni.

He meeting hi Pu Andrew Lalhruaia, DUDO, UD&PA Department, Lunglei in a kaihruai a. Chairman chuan kalkhawm te lawmna nei in Lunglei khawpui hi Environment, Climate Change & Mitigation Strategy Component hnuai atangin khawpui hring nuam taka chei tum vek a ni a, Urban Forest (Green Space) hmun tur Committee in thlan fel vek a nih tawh thu a sawi. Urban Forest (Green Space) atan a thlan tak te chu : 1) Rahsiveng Thlanmual No-1, Rahsiveng. 2) Venglai Thlanmual, Venglai. 3) Tarmita Khawthlir, Chanmari leh 4) Lunglei Park (Children's Park), Chanmari te an ni.

Pu Eddie Zonunkima, SDS, UD&PA department, Lunglei  chuan Urban Forest leh Green Space siam dan tur leh a kal hmang te a sawifiah a. Kalkhawm te hnen ah Green Space siam dan tur Plan of Action te duang chhuak a, khawpui lian zawk te tihdan zir/entawn a ngaih thu a sawi lang. Meeting chuan kalkhawmte hnen ah hmalak dan tur leh hmachhawp te lo bawhzui a, ruahmanna pangngai tak neih fel hun a sawiho leh turin a rel nghal a ni.