Champhai District Volleyball Association (CDVA) buatsaih Independence Day, 2018 puala Volleyball Tournament siam chu vawiin khan Champhai North bialtu MLA Pu TT Zothansanga chuan Kahrawt Field-ah a hawng.

Khuallian Pu TT Zothansanga chuan Champhai District Volleyball Association hruaitu chak takte kaihhruinaa thalaite tana Volleyball tournament buatsaih ani thin chu lawmawm a tih thu a sawiin, an kaihhruaina hnuaiah District Volleyball-in hma a sawn zel a beisei thu a sawi a. Ruihhlo leh a kaihhnawihte avanga thalai tam tak mual an liam mek laia thalai infiammi hrisel tak tak a hmu chu hlimawm a tiin  chhuanawm a tih thu a sawi a. Sawrkarin thalaite hmakhua ngaiin infiamna hmunhma leh bungraw changtlung tak tak a chhawpchhuah sak mek thu sawiin, chungte chu chhawrtangkaia eizawnna ngelnghet siamna atana hmang tangkai thiam thei turin thalaite chu a fuih a. Tunhma lamah Champhai chu infiamna huangah Mizoram mipuite thlir rawn anih thu a sawi a. Hruaitu viak tha leh angaihna hriate kaihhruaina hnuaiah khatiang hun kha a neih let leh theih a ni, a ti a. Infiammi kalkhawmte chu insumtheihna leh taihmakna hmachhuana, infiamna chu eizawnna tlak ani tih hrereng chunga theihtawp chhuah theuh turin a chah a ni. 

Vawiin programme hi Pu Lalhlupuia, President, Champhai District Volleyball Association (CDVA) chuan a kaihruai a. Tv James Lalruatkima Pachuau, Technical Secretary, CDVA-in technical report pekna leh inhmelhriattirna hun a nei a. Pu C. Lallianpuia, Vice President, CDVA-in khuallian hnenah CDVA hmingin thilpek hlanna a nei bawk.

Kumin Independence Day puala Volleyball inelnaah hian Champhai District Volleyball Association hnuaia inziaklut Mipa team 20 leh hmeichhe team 7 an inlan dawn a ni.