Vawiin khan Commerce and Industries Minister Pu H.Rohluna hovin National Handloom Day vawi 4-na Assembly Annexe Conference Hall, Aizawlah lawm a ni.

Pu H.Rohluna chuan handloom ah nasa takin Mizoramin hma a sawn a, Department leh weavers te bakah hemi lama inhmangte thahnemngaih vang a ni, a ti a. Mizo hnam ro pawimawh kawr leh puante chawilarin state pawn lam, a bik takin hmarchhak state dangah Mizo mipuiin hriat kan hlawh phah hle a ni, a ti. Minister chuan chemical hmanga la siam chawp acrylic yarn atanga natural fibre-a inleh a tul hle a, rawngah pawh natural dye hman uar deuh deuh a tul, a ti a. Kan puan tahte Mizoram chhung leh hmar chhak state mai bakah ram chhung hmun dangte leh ram pawn thlenga thawnchhuah tlaka buatsaih a tul tiin ram changkang zawk te duhzawng leh mamawh ang ngaihtuah chunga design mawi leh quality thaa kan siam chhuah deuh deuh a tul a ni, a ti. Commerce and Industries Minister chuan August ni 17 ah Handloom Industry neitute leh weavers-te tan Motivation Campaign, Thenzawlah buatsaih tum niin hetah hian hetiang lama eizawngte a tam thei ang ber kal turin a sawm a. National Handloom Day hi infuihtharna atana hman tul a tih thu sawiin handloom a hmalatu hlawhtling tak tak, he ni hmang tura kalkhawmte hnenah an tawn hriat atanga thangthar, bul tan ve mekte kawhhmuhtu nih tum turin a chah a ni. 

Programme kaihruaitu, Commerce and Industries Director Pu J.Hmingthanmawia pawhin puantah chu Mizo culture nena inzawm tlat, eizawnna hlawk a nih bakah hnam ziarang pholangtu pawimawh tak a nih avangin original design kan neihte hi kan hlut thiam a, a bo loh nan tan kan lak a ngai a ni, a ti.

Mizoram sawrkar chuan Commerce and Industries Department hmalakna in Handloom Research and Promotion Council a din thar a. He Council ah hian department a thawktute bakah designer te leh tawnhriat nei tha te an tel a, hma a la chho tan mek a ni. Commerce and Industries Department hian North East Textile Promotion Scheme hnuaiah hma la in he scheme hi Cluster 17 ah kalpui a ni a. National Handloom  Development Programme hnuaiah block 7 tuam mek niin block thar pahnih pek belh an ni. Weaving Centre pathumah hmanraw tha zawk an neih theih nan ADB sum hmanga ruahmanna siam a ni a. Thenzawlah Handloom Export Facilitation Hub siam tan niin State pum huap inelna State Award for Handloom Weavers and Crafts Persons buatsaih tum a ni bawk. 

Vawiin programme ah hian ‘Introduction of natural fibres, traditional design and motifs’ tih thupui hmangin Pu C.Lalthlenmawia’n thu a sawi a. Weavers Service Centre Assitant Director Pu S.K.Sen chuan lawmthu sawiin hun a khar a ni.