Vawiin khan Rawpui Welfare Committee (RWC), Aizawl te buatsaih "Kan Lenna Rawpui Vangkhua" tih lehkhabu chu Rawpui Community Hall-ah LAD Minister Pu PC Lalthanliana'n a tlangzarh.

Pu PC Lalthanliana chuan mi ropui apiangin mahni chawr chhuahna an ngai hlu a, chawimawi an duh thin tih sawiin, mahni chenna leh chawr chhuahna khaw chanchin ngaihvena chhui nachang hria chu mi fing an ni, a ti a. Rawpui Welfare Committee, Aizawlin Rawpui khaw chanchin a bu-a an buatsaih chu a khaw bu luah mekte leh thangthar lo la awm zel turte tan thil hlu leh tangkai tak a la ni chho zel ang, a ti. Mahni theihna zawn theuhva khawtlang tana hna thawh chu khua leh tuite mawhphurhna a nih thu sawiin, khawtlang mipui kal khawmte chu khawtlang that tlanna ngaihtuah tlat turin a fuih nghal a ni.

Lehkhabu tlangzarh inkhawm hi Rawpui Branch YMA President Pu H. Lalnunpuia chuan a kaihruai a. Upa F. Lianngaia, BCM Rawpui chuan hunserh hmangin, RWC Aizawl Secretary Pu Lalsiamthara Khiangte hnen atangin report leh lehkhabu kamkeuna ngaihthlak a ni a. Rawpui VCP Pu R. Zothansanga leh RWC Aizawl Chairman Pu R. Kailuia te'n thu an sawi bakah, zaithiamte zai ngaihthlak a ni a. RWC Aizawl Asst Secretary Pu R. Lalbiaksanga'n lawm thu sawiin, hun khar a ni.

Rawpui khua hi Lunglei District chhung National Highway 54 kawngpui ana awm a ni a. Sailo lal Khawsaia khua niin, kum 1870 chho vel khan khua hi an sat a. Bungtlanga sawi khawm an nih hnuah kum 1972 khan tuna an khaw hmunah hian let lehin, mei mit lovin an la ding ta zel a ni. Rawpui Welfare Committee, Aizawl hi Rawpui khaw mi Aizawla awmte inpawh tlan nan leh damloh leh chhiat tawh thila khawpui pantute lo tuamhlawm thin turin kum 1997 khan din a ni a. Rawpui khaw chanchin ziahna lehkhabu "Kan Lenna Rawpui Vangkhua" tih hi bialtu MLA Pu PC Lalthanliana hma lakpuinaa puitlin niin, vawiin hian an tlangzarh ta a ni.

Attachment

  • Loading attachment...