Industry Sector hnuaia NLUP Trade hrang hrang thlangtu, Lunglei East leh Lunglei North Cluster-a mite hnenah vawiin khan Parliamentary Secretary Pu Joseph Lalhimpuia chuan Saikuti Hall-ah NLUP 2nd Phase 3rd Installment tanpuina a sem.

NLUP tanpuina sem inkhawm General Manager, DIC Lunglei Pu Lalnuntluanga kaihhruaiah Khuallian Pu Joseph Lalhimpuia chuan Lunglei ‘E’ leh ‘N’ Cluster-a Industry Trade thlangtu ten NLUP an dawng leh thei chu an vanneih hle a; NLUP piah lamah sorkarin ruahmanna hrang hrang a siam turah te pawh tanpuina dawng zel tlak an nih theih nan an trade thlan theuhah rinawm tak leh tihtakzeta thawk zel turin a chah a. NLUP tanpuina hmanga an eizawnna an sawhngheh rualin an fate zirna lamah pawh nasa zawka tuipui leh enkawl tha turin a fuih bawk a ni. Lunglei hmasawnna tur ngaihtuahin sorkar chuan Skill Development & Training Centre, Export Centre ni thei nghal tura din a tum a, hemi atan hian Cheng vaibelchhe 7 dah a ni tawh, a ti. World Bank project kaltlangin Lunglei District bakah Mizoram hmun dangahte pawh kawngpui siamthat leh thawmthat hna thawh a nih tur te, Food processing lamah tan lak leh zual tum a nih thu te, Mizo puantah leh Textiles dang dehchhuah lamah pawh sorkarin nasa zawka hmalak a tum thu te bakah Tlabung hmuna Ind-Bangladesh Trade tihchangtlun dan tur chungchang pawh hmalak tum a ni, a ti.

NLUP Nodal Officer leh Jt. Director, Industries ni bawk Pu Lalhmunsiama pawhin thusawiin tun dinhmunah NLUP hnuaia Industry Trade Beneficiaries leh tanpuina an dawn tawh dan chu hetiang hian a tarlang a ni : NLUP Beneficiaries (as on 10.12.14) :

Phase of NLUPNo. of Beneficiaries

1st Phase- 10731

2nd Phase- 7695

3rd Phase- 5656

4th Phase- 2841

Total- 26923 an ni a.

Heng zingah hian 3rd & 4th Phase Beneficiaries-te chu ‘One Crop, One Village’ Scheme hman tum a nih takah chuan tunah hian Trade thlak duh an awm leh awm loh an enfiah mek a ni. NLUP Industry Trade 2nd & 3rd Installments of 2nd Phase chu heng Clusters-ah te hiam sem kim a ni tawh bawk : Serchhip, Mamit, Hachhek, Dampa, Tuirial, Serlui, Champhai ‘N’, Champhai ‘S’, Lengteng, Tawi, Aizawl East I, Aizawl East II, Aizawl S-I, Aizawl S-II, Aizawl S-III, Lunglei East, Lunglei West, Lunglei North, South Tuipui, Tuichawng leh Palak Clusters. Pu R.Vanlalsanga, IPO-in training leh technical report hun a hmang a. Hmalakna tha lo, thi leh pembo Lunglei ‘E’-ah mi 9 leh Lunglei ‘N’ Clluster-ah mi 4 awmin heng mi 13 te hi tanpuina dawn tur hrensak rih a nih thu a tarlang. Vawiin inkhawma Khuallian Pu Joseph lalhimpuia’n NLUP tanpuina cheque-in hetiang hian a sem a ni :

1. Lunglei ‘E’ Cluster - 193 beneficiaries - Rs.56,34,000

2. Lunglei ‘N’ Cluster - 53 beneficiaries - Rs.15,35,000

Training leh tanpuina sem zawh hian Pu Zathangliana, Lunglei District NLUP Coordinatorin lawthu sawiin hun a khar a ni.

Attachment

  • Loading attachment...