Vawiin chawhnu khan I&PR Conference Hall, Lunglei Bazar Veng-ah Parliamentary Secretary Pu Joseph Lalhimpuia chuan Pu KMS Dawngliana lehkhabu ziah 'Dawn Tithui' tih a tlangzarh.

Tlangzarhna inkhawm MJA Lunglei President Pu K.Lalrinpuia kaihhruaiah Khuallian Pu Joseph Lalhimpuia chuan sorkarin Mizo tawng humhalh leh zirna a ngaih pawimawhzia sawiin thalai leh naupang zawkte zingah mahni tawng ziak leh chhiar thiam lo an awm tan chu pawi hle a ni, a ti. Mizo tawnga lehkhabu ziah emaw tawng danga film siam, Mizo tawnga lehlinah te pawh hian tawngkam hman dik leh hman fimkhur a tul a ni, a ti. Vawiina a thian leh a rawngbawlpui thin Pu KMS Dawngliana lehkhabu tlangzarh ni ta chuan Mizo thalaite leh mipuite tan zirtirna tha tam tak a keng a, a chhiartu zawng zawngte tan mawlsawmna a nih ngei a beisei thu sawiin duhsakna a hlan a ni.

Vawiina tlangzarh ta ‘Dawn Tithui’ hi Pu KMS Dawngliana lehkhabu ziah 7-na a ni a, amah hi Baptist Church of Mizoram hnuaia publications ‘Kohhran Beng’ tih leh ‘Baptist Today’ Editor ni lai mek a ni.