Ni li (4) awh Art Workshop-cum-Exhibition, North East Zone Cultural Centre (NEZCC), Dimapur, Art & Culture Department, Mizoram leh Mizoram Art Development Society (MADS) tangkawpte buatsaih chu vawiin khan Archives Hall-ah a kharna programme hman a ni a. December 9, 2014 (Thawhlehni) khan Pu R. Hmingthanzuala, Joint Director hovin a hawnna hun hmangin bul an tan a.

Kharna programme hi Pu Ngurbiaka, Director, Art & Culture Department chuan kaihruaiin Pi Rosangpuii, Secretary, Art & Culture Department chuan khuallin niin he programme hi a hmanpui a ni.

Pi Rosangpuii chuan Art kan tih mai ‘Kut themthiamna’ heng lemziah leh chei te, thil ker mawi, thiamhnang ang chi te hi mi zawng zawng thiam ni lo, mi bik chauh talent dawn a nih thusawiin Artist ho ropuina ber chu mi zawng zawng hriat leh hmuh thiam ve loh ‘thuruk’ hmanga an talent an pho chhuah thin hi a ni, a ti.

Tun tum Art Workshop-cum Exhibition ah hian Mizoram atangin Sculptor - 3 leh Painter/Artist 10 bakah state thenawm Tripura atangin mi 2 ( Sculptor 1 & Painter 1) an tel a. Handloom leh Handicrafts lamah firm 2 in an thilsiam chhuahte an pho chhuak bawk.

Art tihhmasawn nan hian NEZCC hian ke a pen nasa hle a. India hmarchhak state hrang hrangah programme te an lo hmang tawh thin a. Mizoramah ngei pawh Champhai, Serchhip, Aizawl ah te vawi engemaw zat huaihawt a ni tawh a; Mobile Art Exhibition pawh Aizawl - Lunglei kawng tlangdung khaw hrang hrangah hlawhtling taka neih a lo ni tawh bawk a ni.