1152/2022-2023
Lunglei East AC leh Lunglei HPC Vice Chairman ni bawk, Pu Lawmawma Tochhawng chuan vawiin khan a office chamber-ah a bial chhunga Sports lama ti tha te chawimawina hun a buatsaih sak.

Sport lama ti tha chawimawina hlan te chu Khelo India Football Champion, Mizoram team member pathum – B. Lalramchhana, Zobawk, Malsawmzuala, Zobawk, Lalpekhlua Jongte, Ramthar; Khelo India Table Tennis Single Champion Jeho Himnakulhpuingheta, Chanmari; leh 5th National MMA Championship, 48kg Atom Junior Champion Francis Lalremruata, Ramthar te an ni a. Lunglei HPC Vice Chairman hian lawmpuina thuziak leh sum fai a hlan a ni.

Pu Lawmawma Tochhawng chuan ram pum huapa lawmman pakhatna dawng pha, Lunglei District leh Mizoram ti hming tha tu infiammi te thawhrimna leh inpekna a chhuanawm takzet a ni tiin an kal zelna turah duhsakna a hlan a. Tun dinhmuna hlawhtlinna an chan chu an bultanna chauhah ngaia international level thleng pha thei tur khawpa theihtawp chhuah chhunzawm turin a chah a. Infiammi hlawhtlingte nu leh pa leh an chhungte pawh an fakawm a tih thu sawiin an kal zelnaah tanpuina an mamawh anih pawhin kawng zawn pui a in huam thu a sawi a ni.