1151/2022-2023 

Kolasib dated 5th July 2022: Vawiin chawhma khan DC Conference Hall, Kolasibah India ram district 272-a ruihhlo do beihpui thlakna kalpui mek ‘Nisha Mukt Bharat Campaign’ kalpui dan tur relin District Level Nasha Mukt Bharat Campaign chuan thutkhawmna an nei a. Pu John LT Sanga, Deputy Commissioner chuan thutkhawmna hi kaihruaiin Kolasib zirna in leh Kohhran hrang hrang inkhawm kaltlanga ruihhlo dona chu kalpui tur a rel a ni.

Vawiin thutkhawmnaah hian ruihhlo bawih a tang mek te chhanchhuah mai bak ah ruihhlo la khawih ve lo te fihlim chhunzawmna tur a uar zawk a zirtirna kalpui a pawimawh thu ngaihthlak a ni a. Sawrkar Department hrang hrang, NGO, Khawtlang leh Kohhran hruaitute thawhhona hnuai a Kolasib district chhunga School leh Sunday School-ahte ruihhlo hman sualna lak a fihlim tur a zirtirna kalpui tur a rel a ni.

Pi Lalnunmawii, Superintendent, Jordan Centre tarlan danin April 2022 thleng khan ‘Nisha Mukt Bharat Campaign’ hnuai ah hian Kawnpui, Thingdawl leh Kolasiba High School leh Higher Secondary School thenkhatah ‘Drugs Free Campaign’ buatsaih a lo ni tawh a, Class 6 atanga Class 12 zirlaite tan heng hun hi buatsaih a ni tlangpui a ni.

Agape Moral Reformation Organisation (AMRO) thawktute tarlan danin Lungdai, Kawnpui, Hortoki, Sethawn, Thingdawl, Kolasib leh Bairabia ruihhlo vanga tanpui ngai inziaklut mi 704 an enkawl mek a. National Exhilaration Union Society ( NEXUS) hian Vairengte, Bilkhawthlir, N.Chhimluang, Saiphai leh Saipum khua ahte ruihhlo ngai mi 405 an enkawl mek bawk a ni.

Attachment

  • Loading attachment...