Vawiin khan Lunglei DC Ashish Madhaorao More chuan Saikuti Hall-ah Lunglei District huamchhung atan ‘Fire Prevention Week 2015’ a hawng a; kuminah Lunglei Dist-ah kangmei chhuak hriat tur awm lo sela, kangmei tichhuaktu an awm a man an nih chuan Dan ang a hrem an ni ang, a ti.

‘Fire Prevention Week 2015’ hawnna inkhawm Lunglei DLAO Pu Lalchawimawia kaihhruaiah DC Pu Ashish More chuan Mizote lo neih danin ramngaw a ti chereu dan leh hemi in a nghawng thil hrang hrang sawiin ‘Jhum System’ hi bansan a tul a, hemi thlak nana sorkarin NLUP a kalpui ta hi loneituten an hman tangkai a tul a ni, a ti. Ramkang hian ramngaw chauh ti chhe lovin thil nung hrang hrang a tihchhiat bakah boruak thalo te pawh a tipung nasa a; ruahtui tlak dan pawh a ti mumal lo thin avangin mihring nunna chenin a khawih pawi thei a ni, a ti. Kangmei chhuahna chhan ber pakhat chu ngaihthah leh fimkhur tawk loh vang a ni fo tih sawiin he chhiatna hlauhawm tak pumpelh tur hian fimkhur theuh a tul a, NGO hrang hrang, zirtirtu leh zirlaite, sorkar hnathawk, chanchinbumite bakah kohhran ang pawhin kangmei hlauhawm chhuah loh nan theihtawp a tha kan chhuah a tul a, tichuan mihring nunna leh ramngawte kan lo veng him thei dawn a ni, a ti bawk. VC te pawh mahni area theuh venghim turin a chah a, kuminah hian Lunglei Dist-ah kangmei a chhuak tur a ni lova, mitin te tangrual ila, Pathian pawhin min tanpui ka beisei a ni, a ti.

Week hawnna inkhawmah hian Lunglei SP Pu Zosangliana pawhin kangmei chhuak lo tura mitin fimkhur a tul dan sawiin fimkhur tawk loh vanga kangmei chhuak thin hi a runthlak a, ramtikang emaw mi in tikangtu emaw chu Indian Penal Code-ah Dan bawhchhiatna lian tak a nih thu a sawi. SP report atanga a landanin nikum chhung khan Lunglei Dist-ah ramkang 34 report dawn a ni a, kum 5 kalta chhung khan kang report hi 184 zet report dawn a ni bawk. Ramkang bik hi 120 awmin bawlhhlawh paihna atanga kang chhuak 30, LPG vanga kang 3 leh Motor kang 7 awmin, In kang 24 report dawn a nih thu a sawi. Lunglei District-ah hian Fire Station 2 : Lunglei leh Tlabung-ah a awm a, kangmei a chhuah chuan Police Station Ph.No - 100 leh Fire Station - 0372-232410-ah dial mai turin mitin a sawm nghal.

VC Association President K.L.Chhawnzauva pawhin thusawiin ram tikangtu ngaihdam mai mai te hi sim a hun a, hemi rual hian ramkang a lo awmin a nasat hmaa thelh pawh a hun tawh, a ti a. Ram a lo kan chuan a kanna khua/veng kha District Magistrate-in tul angin a hrem thei tih sawiin mitin te ram tikang lo turin a chah a ni. Hemi hnu hian H. Lianmawia DFO chuan lawmthu sawiin hun tihtawp a ni.

‘Fire Prevention Week 2015’ pual hian vawiin chawhma dar 11:00 atang khan III Gate atanga Pukpui Centenary Lungphunna thleng kangmei chhuak lo tur a inzirtirna kawngzawh a ni.