Pu Lalrinmawia Ralte, Minister of Labour, Employment & Industrial Training etc. chuan vawiin chawhnu khan Agriculture Auditorium-ah Hospitality, Tourism & Hotel Management zirchhuakte hnenah certificate a hlan.
Mizoram pawna hnathawk emaw zir tura kan reng rengin kan awmnate hnam ziarang leh an culture te hriat a tha a, sap thufingin Roma i awm chuan “Rom mi angin awm rawh” an lo tih angin Mizorama kan awm anga awm ngawt a remchang lo thei a, harsatna ten min bawhbuai lohna turin an hnam tih dan kan hriat a pawimawh a ni tiin Pu Lalrinmawia Ralte chuan hnam hrang hrang tih dan a in ang lova kan bula awmte zia leh tih dan kan hriatchian hma chuan kan lo zir lawk a ngai a ni a ti a.
Kan hnam hmasawnna anih beiseiin thangtharte chher chhoha an hmakhua thlir sak hi sorkar tum ber anih thu sawiin Minister chuan mipuiin a kalhmang hre kim lovin demna te pawh hlawh thin mahila, thalaite hnathawh tur nei lo awm mai maite tana thiamna leh hnathawh tur lo ngaihtuah sak chu sorkar tum anih avanga buatsaih thin an nih thu sawiin Mizo nih hrim hrim vanga harsatna an neih chuan sawi hreh lo tur leh thil dangah pawh harsatna an neih chuan amah emaw Youth Commission lam hotute emaw Labour & Employment hotute emaw hrilh hreh lo turin a chah a, an hun lo kal zel turah duhsakna hlanin certificate dawng theia an awm chu a lawmpui thu a hrilh bawk a ni.
Mizoram Building & Other Construction Workers Welfare Board leh Mizoram Youth Commission kaltlanga Mizo hmeichhe 40 te Kolkata a hmunpui nei Emporium Training & Consultancy Pvt. Ltd. a zir chhuakte hnenah Minister hian certificate a hlan nghal a. Heng zirchhuak te hi India ram hmun hrang hranga five star hotel changkang - The Western Sohna & resort, Hyatt regency, AOI-Japanese Restaurant, The Park, Taj Gateway, Holiday Inn Resort, Radisson Blue, JW Marriote, ITC Windsor, Vivanta, Taj Bengal, Hotel Sea Princess, Mana & Company/Bedwin Grand Hotel ah te hna hmuhsak an ni a, thenkhat chu Mizoram-a hnathawh duh zawk an nih avangin Mizorama thawk ta te pawh an awm bawk.
Pu Lalhmachhuana, Director, LE&IT Department & Secretary Mizoram Building & Other Construction Workers Welfare Board chuan certificate semna inkhawm hi a kaihruai a. Pi Jayeeti Saha, VTP Manager, Emporium Training & Consultancy Pvt. Ltd. Kolkata in report a pe a. Pu Francis Lianmawia, Asst. Welfare Commissioner, Welfare Board in lawmthu sawiin hun a khar a ni.
