Vawiin chawhnu khan Lunglei Government College (LGC) hnuaia RUSA Board of Governors chu an Chairman Lunglei DC Pi Lalzarmawii, IAS kaihhruaiin LGC Principal Office Chamber-ah an thukhawm.

Vawiin meeting-ah hian RUSA Infrastructure Grant 3^rd installment hman dan tur rel a nih bakah kum kalta a sum an lo hman tawh te thlir let a ni a. Pi Lalzarmawii chuan Lunglei Government College-ah RUSA sum hmanga zirlai te tana tangkai tak tur ruhrel ruahman chhoh a nih chu lawmawm a tih thu a sawiin College-in hmachhawp hrang hrang a neih te Board of Governor member-te a sawipui.

Meeting neih hnu hian Pi Lalzarmawii chuan College compound chhunga RUSA sum hmanga hmasawnna hna thawh hrang hrang leh hmanraw lei te a enfiah bawk a ni.

Rashtriya Uchchatar Shiksha Abhiyan (RUSA) hi education lama Sawrkar Laipui hmalakna pawimawh tak niin  hemi scheme hnuaiah hian higher education tihchangtlun nan College ten sum an dawng thin a. Board Of Governors ah hian Lunglei Government College thawktute bakah YMA leh MHIP hotute an tel bawk.