Lunglei High Powered Committee bultumin Govt. High School, Lunglei-a tuizem ‘water reservoir’ sak chu vawiin khan HPC Vice-Chairman Pu S.Laldingliana hovin a hawnna hun hman a ni.

HPC Vice-Chairman Pu S.Laldingliana chuan Lunglei High School chu Mizorama H/S upa ber dawttu a ni a, zirtirtu tha tak tak neiin a din tirh kum 1948 atangin vawiin thlengin tluang taka a kal zel thei chu a ropui hle a ni, a ti a. Zirna tih hmasawn leh zirna in te thawmthat kawngah HPC chu a inhawn reng thu a sawi a, an mamawh ang ngaihtuah sak a nih rualin zirtirtu leh zirlai ten an tih ve tur chu zirna lamah theihtawp chhuah hi a ni, a ti. Kumin HSLC-ah Lunglei atangin Topper kan nei thei chu a chhuanawm hle a, anni ang bawkin zirlai dangte pawhin nasa lehzuala tan la a, Lunglei bakah an sikul leh zirtirtute tihmingtha turin zirlaite a fuih a. Zirlai naupangten phur tak leh nuam ti taka lehkha an zir theih nan zirtirtu te chu tan la sauh sauh turin a chah bawk.

Govt H/S Lunglei Headmistress Pi Dengsailovi Zadeng-in pawhin thu sawiin HPC Vice-Chairman Pu S.Laldingliana duhsakna avangin an sikul-in a mamawh em em tuizem lian tha tak an nei thei ta chu a vanneihthlak hle a, an sawmna ngai pawimawha a lawmna inkhawmah a rawn tel theih avangin a lawmawm takzet a ni, a ti.

HPC Vice-Chairman Pu S.Laldingliana hi Lunglei High School building hlui zawk kum 1963-a sak tawh chu Headmistress leh zirtituten fanpuiin, school hall leh teachers’ staff room sak that ngai lai te an enpui a. Pu S.Laldingliana chuan school building sakthat hna chu HPC kaltlangin theihtawpa hma a lakpui tur thu a hrilh a ni.

Govt. High School, Lunglei hi kum 1948-ah din tan a ni a, tuna a dinna hmun Chanmari-ah kum 1963 khan school building sak zawh hnuah an insuanlut a. Tun dinhmunah he sikul-ah hian Lunglei leh a chhehvel khaw hrang hrang atangin zirlai 361 an awm mek a, Headmistress leh zirtirtu 22 ten an enkawl a ni.