FAO (Food and Agriculture Organisation) bul tumin vawiin khan Horticulture conference hall-ah Inception Workshop neih a ni a. Horticulture leh Agriculture department te nena FAO thawh hona tur chungchang zir ho a ni a. Pu K.Lalrinthanga Parliamentary Secretary-in a tel pui a ni.

Workshop hi FAO Representative in India, Dr. Kevin D.Gallagher in a kaihruai a. Ani bakah Dr.Prem Sharma, International Senior Operation Consultant, FAO, India leh Dr.A.A.Paliwal, Senior MiSALT Adviser, FAO Consultant ten UN Joint Initiative Project kalpui mek hnuaia Mizoram buh leh thlai thar tipung tura FAO ruahmanna te sawiin presentation an nei a. Hnathawhna tur sum ruahman chungchang pawh sawiho a ni.

Pu K.Lalrinthanga chuan NLUP chungchang leh a thil tumte sawiin UN Agency te nena thawh hona chuan Mizoram tan hmasawnna tam tak a thlen ngei a beisei tih a sawi a. Dr.Kevin pawhin UN Joint Initiative hnuaia FAO leh Mizoram sorkar thawh dunna chuan project lian zawk a la hring chhuak ang tih a rinawm thu sawiin tun hnaia Ministry of Forest & Environment bul tuma Global Environment Facility meeting ah dollar maktaduai 128 lai senga hma lakna turah Mizoram chu India rama state 5 thlan chhuah zingah a tel tih a sawi bawk a ni.

Vawiin Inception workshop ah chuan Agri-Horticulture chungchang bik zirho a ni a. Naktukah ranvulh leh ran natna chungchang bik atan workshop hi neih chhunzawm a ni ang.