Lunglei leh a chheh vel tui in tur lakna Lunglei Greater Water Supply Scheme tui pump chhuahna pipe lian NEDP sum cheng Nuai 31, sing 3, sang 9 senga siam chu vawiin khan Er. Lalmuanzova Engineer in Chief PHED Mizoram chuan a hawng.

Hawnna inkhawm tawi Pialthleng hmuna neih Er. H. Lalsiamliana, EE, PHE, LWSM Division kaihhruaiah khuallian Er. Lalmuanzova chuan thu sawiin hman raw tha zawk leh khawl changtlung zawk hmanga Lunglei mipuite tui intur lakchhuahna kawnga rahbi thar an kai chu Lungleia PHE Department a thawktute thawh hona a that zia a lan thu a sawi a, Lunglei mipuite pawhin tui in tur hnianghnar zawk a an hmuh theih a beisei tiin Department. a thawktute thahnem ngaihna tak tak nen hna an thawk tih a lang chiang hle a ni a ti a, faina kawngah pawh hmuh theihin hmasawnna a lang a, hei hi chhawm nung zel tura tan kan lak a ngai a ni a ti bawk.

He hunah hian Er. Sairengpuia Sailo SDO chuan hnathawh dan report pein, tui pump chhuahna ber pipe lian common header hlui chu kum 20 chuang zet hman a nih tawh thu leh a that tawh loh avanga tui pawh duh anga chaka pump ngam a nih tawh loh thu a sawi a, header thar vuah a nih takah hian khawl pahnih hmangin tui an pump thei tawh dawn tih sawiin Lungleia tui harsatna awm thin pawh a ziaawm phah hle dawn a ni a ti. Common Header thar hawnna inkhawmah hian Er. C Lalremsiama CE, PHED Zone II leh PHE Lunglei SE Er. K. Vanlalnghaka te pawhin thu an sawi bawk a ni.

Greater Lunglei Water Supply Scheme, Pialthleng hmun a mi hi India rama tui pump chhohna sang ber pawl a mi niin kum 1995 khan hawn a ni a, mipui 66000 chuang chawm thei tura ruahman a ni.