Vawiin chawhma khan Engineering Officers Club, Babutlangah Thingsai zirlai pass tharte leh khawtlang tana mi tangkaite chawimawina hun hman a ni a. Minister of Health & Family Welfare, I&PR etc. Pu Lal Thanzara chu Khuallian niin Pu Lalthafamkima Jongte, SP Lunglei chu Khualzahawm a ni a. Programme hi MSU Sub-Headquarters Thingsai buatsaih a ni.

Khuallian Pu Lal Thanzara chuan zirna leh khawtlang tana rawngbawlna hi thil kal kawp tlat a ni tiin zirna tel lovin hmasawnna a thleng thei lova, miin khawtlang thatna tur atan rilru leh ngaihtuahna a sen loh chuan khawtlangin hma a sawn mawh thin a ni, a ti a. Khawtlang tana mahni hun , tha leh zung bakah sum leh pai senga khawtlang thatna tur ngaihtuahtute inpekna leh thawhrimna chu chhuanawm a tih thu a sawi a.  Zirna in a ken tel thiamna leh finna hi kan mihring pui leh khawtlang tana kan hman hian midang tan malsawmna kan thlen thin a ni, a ti a.

Minister chuan kan ramah HIV/AIDS vei an tam thu sawiin kan inkaichhawnna ber chu mipat hmeichhiatna vang anih thu a sawi a. Nun uluk pawimawhna sawiin reilote atana nawmsakna anga lang lakah inthiarfihlim a tul thu a sawi a. Mizote hian hnamdang kan tluklohna thin chu tum mumal kan neilo leh kan daih rei lohna hi a ni tiin, zirlai nih lai atangin zir zawh huna tih tur leh  thawh tur ngaihtuah lawk hi a finthlak a ni, a ti a. Zirlai kalkhawmte chu an zir zelna turah ngaihtuahna fim hmang turin leh mi chhawrtlak, mahni thiamna avanga ding chhuak thei ni turin a fuih a. Khuallian chuan Vocational school chhawr tangkaia, mahni ke ngeia ding thei turin a chah bawk a. Zirlaite chu an kal zelna turah duhsakna a hlan nghal bawk a ni.

Vawiin programme-ah hian graduate-te hnenah Pi Lalsangzuali Sailo Award hlan an ni a. Post Graduate-te hnenah Pu Selthuama Award hlan an ni. Khawtlang tana tangkai mi 6 chawimawi an ni bawk a. An vain mi 25 an ni.

Thingsai MSU hi July Ni 14 , 2012 khan din niin 2013 atang khan zirlai pass tharte chawimawi thin an lo ni tawh a. Khawtlang tana mi tangkai chawimawina hi tum 3-na a ni.

Vice President MSU Thingsai, Vanlalzawma chuan programme hi a kaihruai a. MSU Secretary Jonathan K. Laldinpuia’n report pein MSU Thingsai President F. Lalrinliana atangin thusawi ngaihthlak a ni a. Khuallian leh Khualzahawm ten zirlai pass tharte leh khawtlang tana mi tangkaite hnenah citation an hlan a. Khualzahawm atangin thusawi ngaihthlak a ni a. MSU Asst. Secy H. Lalhriatpuii’n lawmthu sawina in hun a khar a. Programme hi chawhnu lama chhunzawm leh tura ruahmanna siam a ni.