No.1027/2021-2022

Lunglei the 18th June, 2021 - Lunglei Civil Hospital Compound-a Laboratory Building sak hna nimin June ni 17, 2021 a bultan chu vawiin khan Lunglei HPC Vice Chairman Pu Lawmawma Tochhawng hovin a hmunah enfiah a ni. He hunah hian Lunglei PWD Building Division EE Er Zirsangliana, Medical Superintendent Dr SR Ngurchamliana, sawrkar hnathawk dangte leh media mi te an tel a ni.

Laboratory Building/Block hi Lunglei Civil Hospital-a Trauma Centre sak mek bul chiah H&FW Department staff quarter hlui awmnaah sak tum niin helai hmunah hian nimin atangin a laih hna thawh tan a ni. Laboratory Building ruahman mek hi a dung zawng 30.8 metres tur niin a vang zawngin a zau lai berah 13.65 metres tur a ni.

Pu Lawmawma Tochhawng chuan ‘Lunglei Civil Hospital Compound-ah Laboratory changtlung tak, Mizoram chhim lam district pali te tana ro tling tur sak hna bul kan tan thei hi a lawmawm takzet a ni’ tiin tluang tak leh harsatna awm lova peih fel thuai anih theih a beisei thu a sawi. Lunglei Civil Hospitalah Laboratory Building din ngei anih theihna tura Chief Minister Pu Zoramthanga leh H&FW Minister Dr R. Lalthangliana te thahnemngaihna leh hmalakna avangin an chungah lawmthu a sawi bawk.

Laboratory Building hi Lunglei Civil Hospital Compound huamchhunga OPD Complex hnung lam ram ruak ah ruahman tum hmasak phawt niin helai hmun hi engineer leh geologist ten an zirchian hnuah him tawk lova an hriat avangin a sakna tur hmun hi sawn anih thu HPC Vice Chairman chuan sawiin tuna sakna hmun hi engineer leh geologist-ten an approve hnuah hmalak tan anih thu a sawi. He hmalakna ti hlawhtling tur hian a kaihhnawih sawrkar department-te pawhin thawhhona tha tak an neih a tul dawn a ni tiin harsatna leh mamawh an neihte inthlahrung lova sawrkarah thlen thuai thin turin a chah a ni.