No.1028/2021-2022

Aizawl, 18th June, 2021 : COVID-19 hri kaite enkawlna tur hmun Dedicated Covid Health Centre (DCHC) atana ruahman, MINECO-a Mizoram Rural Bank (MRB) Head Office sak zawh hlim chu Medical Operational Team on COVID-19 Chairman Dr ZR Thiamsanga'n ribbon chep chatin a hawng.

Hawnna inkhawm tawite MRB Auditorium a buatsaihah khuallian Dr ZR Thiamsanga chuan Mizoram Rural Bank in an Head Office sak zawh hlim, an luah hma hauha phal taka hripui leng dona atana hman an phal chu lawmawm a tih thu a sawi a, hmunhma tha mamawhna a san lai taka anni pawhin luah hlan an nghahhlelh em em an Head Office building hman an phal chu chhinchhiah reng tlak a nih thu a sawi a, mamawhna hriaa building rang taka peihfeltu contractorte leh MPWD chungah lawmthu sawiin, DCHC atana hman theih tura theihtawp chhuahtu Health department a thawkte leh ZMC hotute chungah lawmthu a sawi bawk a ni.

Dr ZR Thiamsanga chuan COVID-19 hri kai zinga a na zualte enkawlna Zoram Medical College Dedicated Covid Hospital (DCH) chu damlo na zual an tam avangin engtiklai pawh hian a khat deuh reng a, damlo na zual admit belh tur pawhin harsatna tawh chang a tam thin a, sawrkar hotuten ngaihtuahna sengin ZMC-a damlo enkawl, that lam pan tawh, mahse enkawl uluk deuh la ngai site enkawlna tur an ruahman a, MRB Head Office a lo awm remchang hi a lawmawm takzet a, hei hian ZMC a khum inchanlohna thui takin a chhawk zangkhai ngei dawn a ni, a ti a. ZMC ah ICU telin khum 247 neih mek a ni a, tunah hian khum 60 awmna ward pahnih peihfel tep tawh niin, third wave laka inpuahchahna atan naupang enkawlna tur bik pediatric ICU pawh ruahman a nih tawh thu a sawi.

Mizoram Rural Bank Chairman Vadde Jaya Chandra pawhin India rama Rural Bank 43 zinga Head Office mahni puala nei thei 5 zingah an tel ve ta tih sawiin, India hmarchhakah phei chuan MRB chiah mahni puala Head Office nei thei an nih thu a sawi a. Head Office chu kum 6 chhunga sak a nih thu leh luah hlan an nghahhlelh thu sawiin, a hmunhma duhsak taka petu Mizoram sawrkarin hripui leng dona atan an mamawh tih an hriatin phal taka an remtih nghal thu a sawi a, Mizoram sawrkar leh mipuite tan an lo tangkai ve thei chu lawmawm an ti zawk a ni tih sawiin an mamawh chhung hman an phal thu a sawi a ni.

MRB Chairman chuan an hnena bank account neite zingah COVID-19 hri kai an awm chuan an inenkawlna senso rulhna tur COVID loan an ruahman thu sawiin, thla bi hlawh neite tan cheng nuai 5 thleng leh thlabi hlawh nei lote tan cheng nuai 3 thleng an pek theih tur thu a sawi bawk a ni.

Dr. H. Lianthangpuia, Nodal Officer, DCHC, MRB, MINECO-in report a pek danin June ni 1, 2021 khan DCHC tihpuitlinna atan mawhphurtute an inruat a, DCHC thar hi khum 50 awm theihna tura ruahman niin a bul tan nan khum 10 dah phawt a ni a. Heta thawktur staff nurse 24 lak fel tawh an ni a, Ward Superintendent 2 leh NHM nurse 6 thawkturin tihfel an ni tawh bawk. Medical attendant mi 20 lak tur zingah mi 17 lak fel an ni tawh bawk a, training pek fel vek tawh an ni.

DCHC thar hi ZMC a COVID-19 hri kai enkawl, an dinhmun ziaawm deuh tawh, uluk taka vil zui la ngaite dahna tura ruahman niin, oxygen leh medical equipments tul dangte a thuam a ni.

Vawiin DCHC hawn inkhawm hi Health Secretary Pu R. Lalramnghaka'n kaihruaiin, Health department leh ZMC hotute an tel a, Dr. F. Lallianhlira, Principal Director, H&FW Department in lawmthu sawina in hnu a khar a ni.