No.6533/2020-2021

13th November, 2020 - High Powered Committee, Lunglei District hnuaia ei leh bar intodelhna kawnga hmalakna peng pawimawh tak pakhat, kuthnathawktute vaimim thar chhuah atanga ar chaw siam chhinna hun Demonstration on ‘Local Production of Poultry Feed’ chu vawiin khan Maize Storage Hall, Mizoram Polytechnic Campus-ah buatsaih a ni.  He Project kaltlang hian ar chaw siam chhuah a, state dang atanga ar chaw lalut lova intodelh tuma hmalak mek a ni.

‘Local Production of Poultry Feed’ project hi HPC Lunglei, Agriculture Department, AH&Vety Department, Horticulture Department leh Commerce & Industries Department-te tangkawp hmalakna a ni.

Vawiin program Pu C.Vanlamuana CPO, HPC kaihhruaiah Pu Lawmawma Tochhawng chuan Mizoram-in Covid-19 hripui avangin hun harsa tak a hmachhawn mek a, ei leh bara intodelh a pawimawh zia a lang chiang hle a. HPC Lunglei pawhin ei leh bara kan intodelh theihna turin theihtawp a chhuah zel dawn a, kan kutkawih ngeia kan thar leh siam chhuah, project tha leh tlo kalpuia mipui tam zawkte tana eizawnna ngelnghet siam sak hi kan tum ber a ni, a ti a. Ei leh bara Lunglei District a intodelh theihna tura hmalaknaa hlawhtlinna hmuh chhoh mek chu lawmawm a tih thu sawiin hemi atana Chief Minister, Lunglei HPC Chairman ni bawk Pu Zoramthanga phur puina leh hmalakna avanga hetiang dinhmun thleng thei an nih thu a sawi. ‘Local Production of Poultry Feed’-chu PPP (Public Private Partnership) mode-a la kalpui tum niin a tupui leh a thawk peih tan kawng ala inhawng dawn a ni, a ti bawk.

‘Local Production of Poultry Feed’ project atan hian SEDP Maize kaltlanga Lunglei District kuthnathawktute vaimim tharchhuahte chu HPC Lunglei-in kg khatah cheng 25 zela leiin tun dinhmunah vaimim quintal 770.445 (cheng nuai 19.26 man hu) a lei tawh a, ala lei chhunzawm zel a ni. SEDP-Maize Scheme hi 13/04/2020 khan HPC Vice Chairman-in tlangzarhin Lunglei District chhungah vaimim chinna tur khaw 18-ah Cluster 19 ruahman niin ram zau zawng hi a zavaiin Acre 475 a ni a, kuthnathawktute mi 619 an tel a. Heng vaimim thar atanga ar chaw siam chhuah hi ‘HPC Artui’ project hnuaia Cooperative Society panga - Zobawk S, Ramthar, Pukpui, College Veng leh Lunglawn hnuaia beneficiary chhungkaw 100 te hnenah subsidized rate a hralhchhuah tur niin ar vulh dangte tan pawh lei theih tura ruahman a ni. HPC Artui project hi Rainbow Rooster ar note 10,000-in nikum December thla khan bul tan a ni a, an artui tharchhuahte Lunglei District-ah hralh chhuah mek zel a ni.

Ar chaw siam chhuah nan hian vaimim fang (60%) bekang dip (20%), wheat vai (11%), chengkawl dip (8%) leh Minerals (1%) leh Vitamins (200g/100kg) hman niin vaimim tih loh hi chu tun dinhmunah phai atanga chah chhuah a ni a. Ar chaw siam chhuak tur hian HPC Lunglei chuan khawl pakua (9) lei tawhin chung te chu sheller pahnih, grinder pathum, mixer pahnih leh packaging machine pahnih a ni a. Grinder machine leh Mixing Machine-te hi tualchhung kutchhuak niin Pu Ramdinmawia,VB Agri, Haulawng leh Pu JH Lalramzauva, RZ Construction Lunglei te siam chhuah a ni.  

Vawiin program-ah hian a kaihhnawih sawrkar official-te, HPC member-te, ar vulhtute, kuthnathawktute leh sawm bik dangte an tel a ni.