No.6534/2020-2021

Dated Khawzawl, the 13th November, 2020 : Khawzawl District Education Committee thutkhawm hmasa ber chu vawiin chawhnu khan Khawzawl DC Conference Hall-ah Chairman Pu Zothanmawia, Khawzawl DC hova neih a ni.

Pu Zothanmawia chuan Nu leh paten sum tam tak senga private School-a an fate an luhtir kher ngai lova Sawrkar School hi an fate tan a tha tawk tih an hriat a tul hle a ni, a ti a. Zirlaiten zirtirna tha tak an dawn bakah a thlawn a zirlaibu, Uniform leh chaw chhun an dawn theihna Sawrkar School chu nu leh paten ngaihhlut nachang an hriat a tul tih sawiin,  Sawrkar School-a lut zirlai an tam zawk theihna turin mipuite-ah infuihtharna neih tha a tih thu leh hemi atan hian Local Cable TV-ahte sawihona buatsaih tha a tih thu a sawi bawk.

Meeting-ah hian DEO Pi K. Lalsiamliani chuan Samagra Shiksha chungchang Member te hrilhhriatna a nei a, hemi hnu hian hmalak dan turte an sawihova. Hmalakna hmasaah Enrollment Drive neih nise an tih bakah mipuiten Sawrkar School that biknate an hriat theihna turin Local Cable TV 2-ah te sawihona Discussion buatsaih nise an ti a, Discussion a tel turte an inruat fel nghal a ni.

Khawzawl District-ah hian tun dinhmunah Samagra Shiksha Primary School 39 awmin zirlai 1,622 an awm a, Middle School 36 awmin zirlai 1,694 an nei a, High School 14 awmah zirlai 750 awmin Higher Secondary School 2 awmah zirlai 275 an awm a, School awm zawng zawng hi 91 niin zirlai 4,341 an nei a ni.Khawzawl Sub-Divisional Education Office chu tunhnaiah District Education Office-ah hlan kai niin Samagra Shiksha District Project pawh hawn a ni a. SDEO Pi K. Lalsiamliani'n DEO leh District Project Coordinator, Samagra Shiksha chu a chelh kawp rih a ni.

Vawiin Meeting-ah hian DC bakah hian Addl DC, DEO, V.O. bakah NGO hrang hrang aiawhte leh Prominent Citizen-te an tel a.