No.6535/2020-2021

Aizawl, the 13^th November 2020 : Vawiin khan Chief Secretary’s  Conference Hall-ah State Steering Committee on Covid-19 Vaccination meeting pawimawh tâk neih a ni.

Meeting hi Chief Secretary Pu Lalnunmawia Chuaungo in a kaihruai a. Sawihawnna neiin Covid Vaccine lam hawi meeting neih theih a ni chu lawmawm a tih thu a sawi a, a hma lama meeting neih a ni thei hi a lawmawm zual a ni tiin state dang zawng aia hma la ṭha nih tum turin Health Department leh member kalkhawmte a chah a ni.

Health & Family Welfare Secretary Pu H.Lalengmawia pawhin a hma lama hmalakna awm chu lawmawm a tih thu sawiin, khawvel ram hrang hrang ten vaccine siam chhuah lamah trial an neih mêk thu leh 2021 chawhma lamah chuan India ram pawhin vaccine kan neih ve tawh a beisei awm thu a sawi a.

National Expert Group on Vaccine Administration for Covid-19 (NEGVAC) in State Steering Commitee on Covid-19 Vaccination te chu Covid-19 Vaccine Introduction atan hma la tur leh state chhunga hmalaknate vil zui turin a ruat a. A khat tawka meeting nei turin a beisei a ni. State Task Force Committee din a, chumi hnuaiah District tinah DC chairman-na hnuaia District Task Force Committee on Covid19 Vaccination din leh tur a ni ang.

NEGVAC-in a ruahman danah chuan a tahtawlin Health Institution  hnuaia thawktu, Private leh Govt. Database a khawn khawm mêk a. MoH&FW chuan Covid Vaccine pek hmasak tur ruahmanna hi a la siam chho zel dâwn a ni. Mizoram sawrkar hnuaia Department hrang hrangte he committee-ah hian telin, Department zawng zawngte tanrualna a pawimawh thu Chairman chuan a sawi lang bawk.

Dr.Eric Zomawia, Mission Director NHM, chuan “Brief overview of COVID-19 Vaccination and guidelines for creation of HCW database for covid19 Vaccination” tih thupui hmangin powerpoint presentation kimchang takin a pe.

Hetianga ruahmanna a kal mek lai hian Sawrkar Laipui chuan Vaccine Company leh a siamchhuaktu ram leh brand hming hman tur hi ala puang lo a ni. COVID-19 vaccine a awm huna lo dah ṭhatna tur hmun (cold chain point) leh a sem chhuah dan (logistic and transportation) te uluk leh ngun thluk taka sawi hona neih a ni a. Hrivenna lam (Immunisation) kaih hnawih hrang hrang te leh harsatna awm mekte bakah hmalak chhoh zel dan turte kimchang taka sawi ho a ni bawk.

Meeting hi dept hrang hrang head te bakah  Development agency WHO, UNICEF, leh UNDP aiawh ten an telpui bawk a ni.