Vawiin khan Lunglei East bialtu MLA leh Lunglei HPC Vice Chairman ni bawk Pu Lawmawma Tochhawng hovin sawrkar hotute leh khawtlang hruaituten Electric Veng, Lungleiah kawngpui leh tuihawk luankawr siam that ngai leh hmasawnna hnathawh tul dangte a hmunah kalin an enfiah.

HPC Vice Chairman Pu Lawmawma Tochhawng chuan District road leh veng chuan hnuai zawkte inkal pawhna kawng te chu hun rei tak siam that tawh loh a tam avangin hmalakna tur a tam thu a sawi a, fur ruah tui thlen hma ngei a a pawimawh chinte siam that a nih theih nana hmala turin Department hotute hi a ngen a ni. Faina leh thianghlimna kawngah te, zun leh ek inthiarna chungchangah te, bawlhhlawh leh thli paih leh sawngbawl kawng ah te hmabak nasa tak kan la nei ni tiin mipui mimir ten fai duh tak tak na thinlung anlo neih chhoh theih nan inzirtirna uar zawka kan kalpui a ngai a ni, a ti. HPC Vice Chairman ho hian AH& Vety Department hnuaia ran talhna hmun ‘Slaughter House’ Electric Veng pawh tlawhin helai hmun tangkai zawka hman a nih theihnan sawrkar official-te leh khawtlang hruaitute hmalak dan tur a sawipui.

Vawiina culvert leh side drain bakah kawngpui siamthat ngai te hi PWD Department bakah HPC atanga siam tura ruahman an ni a, PWD Lunglei hotute chuan a siam that dan tur ruahmanna a hma thei ang bera peih an tum thu an sawi. HPC Vice Chairman hi PWD (Lunglei Division) SDO Er.HC.Zirliana, DIPRO Pi C. Lalremruati, Lunglei MJA hruaitute, leh party hruaituten an tawiawm a ni.