76/2023-2024

Lunglei the 11th April, 2023 – Vawiin khan Lunglei HPC Vice Chairman Pu Lawmawma Tochhawng kaihhruaiin HPC Conference Hall-ah Lunglei Municipal Councillor tharte lawmpuina leh inhmelhriatna hun neih a ni. He hunah hian Lunglei DC Pi Ramdinliani, IAS, Lunglei SP Pu Rahul Alwal, IPS leh official dangte bakah LMC Councillor-te leh Lunglei Sub Hqrs YMA hruaitu thar te leh media mi te an tel a ni.

Lunglei HPC Vice Chairman Pu Lawmawma Tochhawng chuan LMC Councillor tharte chu a lawmpui takzet thu sawiin Lunglei ti hmasawn tura hmathlir tha tak tak an neihte an tih hlawhtling ngei theihnan theihtawp chhuah tura chahin duhsakna a hlan a. Lunglei Municipal Council chu Lunglei District tana mellung thar pawimawh tak anih angin LMC Board of Councillors hmasa ber te chu an mawhphurna a sang takzet a ni, a ti a. Mipui tana kan hnathawhna leh rawngbawlna hi Pathian rawngbawlna pawimawh tak a ni tih kan hriat nawn leh fo a tha ani tiin kalkhawmte chu an hma zawn theuha tih tur awmte uluk leh taima taka thawk thin tur leh mipui hamthatna dah hmasa zel turin a chah a. Kan ram leh hnam ina hmasawnna kan neih tawh hrang hrang ah te politician te contribution a tam takzet a ni tiin Lunglei HPC Vice Chairman chuan kan ram hruaitu hmasa leh hruaitu mek te hnathawh leh sulhnu hlu tak tak te mipuiten kan hlut thiam a tul a ni, a ti a. Lunglei Municipal Council nena thawhhona tha tak neih theihnan kawng engkima hmalak puiah a sawm nghal bawk a ni.

He hunah hian Lunglei DC Pi Ramdinliani, IAS, Lunglei SP Pu Rahul Alwal, IPS, Lunglei Municipal Councillor-te leh midangten thu sawiin Lunglei tana hmalak tlan zel dan tur te an sawiho a ni.