75/2023-2024

Mamit 11th April, 2023 : Shri. B. L. Verma, Hon'ble Union Minister of State for Development of North Eastern Region & Cooperation, Govt. of India chuan vawiin khan Mamit tlawhin Luangpawl Helipad-ah Mamit District Officials te'n an lo dawngsawng.

Union Minister ho hian DC Conference Hall, Mamit-ah Aspirational District hnuaia hmalakna hrang hrangte Review Meeting neih zui nghal a ni.

Meeting-ah hian Pu V. L. Remliana, Mamit District Bawrhsap chuan Union Minister-in Mamit District a rawn tlawh chu lawmthu sawiin kan District chu Aspirational District kan nih avangin Sawrkarin min ngaihsakin min duhsak a, Union Minister-in min rawn tlawh pawh hian hmasawnna tha tak a hrin ngei a beisei thu leh a duh thu a sawi.

Shri. B. L. Verma, Union Minister chuan Mamit District Bawrhsap leh Department hrang hrang hotu a thawhpuite chu District hmasawnna atana tha leh zung an senna-ah lawmawm a tih thu a sawi a, Delta Ranking-ah hmasawnna hmuh tur awmte chu a lawmawm takzet a ni tiin tan la zel turin a chah.

Sawkar Laipui chuan North East tan hian theihtawp a chhuah zel a, kan Prime Minister ngei pawhin North East hi tum 50 lai a tlawh tawh a ni tiin, chu chuan North East hmasawnna atana rilru a senzia a entir a ni a ti. North East Road leh highway tihhmasawn nan sum tam tham tak sen tawh niin sen belh zel tura hmalak mek a ni a. Tunhma-a inkalpawhna kawnga harsatna kan neihte sutkian mek zel a nih thu tarlangin Ministry hrang hrang hotute leh North East-a Chief Minister te thawhhona azarah hmasawnna chak taka kalpui mek zel a ni a ti. Union Minister chuan Mamit District-in hmasawnna rahbi a neih theih nan Cooperative Societies te tha tichak turin a Ministry enkawl chuan theihtawp an chhuah thu a sawi a. Harsatna an neihte a hnena thlen hrehlo turin a chah bawk a ni.

Minister hnenah hian Farmers Society hrang hrangte'n an harsatna lo thlenin Minister hian a theih ang anga lo enzui a, hmalakpui a tum thu leh an harsatna te ziaka thehlut turin a chah bawk.

He hunah hian Pu Henry Malsawmtluanga, SDC & Nodal Officer, Aspirational District Programme chuan Aspirational hnuaia hmalakna leh Delta Ranking dinhmunte a lem nena entirin sawifiahna a nei nghal bawk a ni.

Union Minister hi Dy. Secretary, DoNER-in tawiawmin Meeting-ah hian Mamit khawpui chhunga Department hrang hrang hotute, tlawmngaipawl aiawh leh khawtlang hruaitute bakah thutharthehdarhtute an tel a ni.