74/2023-2024

Champhai, the 11th April, 2023: Special Assistance to States for Capital Expenditure (SASCE) Scheme sum cheng nuai 450 senga Farkawn Public Playground-a Phullem (Astro/Synthetic Football Turf) phah thar chu vawiin chawhma dar 11 khan Bamboo Link Road Board Vice Chairman Pu Ramthanmawia, East Tuipui bialtu MLA chuan khuallian niin a hawng. He hunah hian Pu John Tanpuia, Secretary, Mizoram State Sports Council (MSSC) chu khualzahawm a ni.

Khuallian Bamboo Link Road Board Vice Chairman Pu Ramthanmawia chuan hripui leng avanga harsatna hrang hrang tawh karah Sawrkarin hmasawnna ruhrel pawimawhte ngaipawimawha a siam chhoh zel thu sawiin, Mizoram khawchhak kilkhawr taka awm Farkawn khaw Field-a phullem tha tak phah a nih theih nana Department, Contractor, khawtlang hruaitute, Tuipuiral Games & Sports Association leh mithahnemngaite inpekna fakawm a tih thu a sawi a. Farkawn mai nilo Tuipuiral khaw dangte tana chhawr tangkai theih tura ruahman a nih thu sawiin, East Tuipui bial khaw dangahte pawh siam tuma ngaihtuahna sen a ni, a ti a. Infiamna kawnga thalaite tuihalna sutkian nan football mai nilo, sports discipline dangahte pawh hmasawnna ruhrel siam chhoh zel tum a ni, a ti a. Infiamna chawilar leh hemi hmanga ruihhlo do zel tum a nih thu sawiin, nakin zela ram leh hnam innghahna tur thalaite ruihhlo laka chhanchhuah nan Sawrkarin infiamna chawisan zel a tum thu a sawi bawk.

East Tuipui bial MLA ni bawk Pu Ramthanmawia chuan Tuipuiral mipuite chu zonun zemawi tak chhawmnungtu leh inlungrual tak an nih thu a sawi a. Harsatna hrang hrang; hripui, lirnghing, Vawk pul hri leh thenawm ram buai avanga raltlan chhawmdawl ngaite buaipui kawnga NGO, Kohhran, Agency leh khawtlang mipuite lungrual taka hmalakna chu chhuanawm a tih thu a sawi a. Tanpui ngaite chunga that chhuah chuan malsawmna a thlen thin a ni, a ti a. Thenawm ram buai avanga sahimna zawnga Mizoram pantute tuamhlawm kawngah lungrual taka tanho a pawimawh thu sawiin, Mizoram beltu raltlante chu ram Dan siamte ngai pawimawha zawm tur leh, khawtlang hruaitute thawhpui thiam leh thlawptu nih tum theuh turin a chah bawk.

Khualzahawm Mizoram State Sports Council Secretary Pu John Tanpuia chuan Farkawn Playground-a phullem phah thar a ni chu a lawmpui thu a sawi a. Infiamna ruhrelte chu awlsam taka neih mai theih a nih loh thu sawiin, Mizoram Sports Policy duan thar chuan mipuiten hriselna tha an neih theih nan hma a lak thu a sawi a; mipui hriselna chuan hnam hriselna a siam a ni, a ti a. Mizo infiammite khawvel puma lang tham tura tanpui leh mipui huapzo infiamna chawikan a tum thu a sawi bawk.

Sawkar laipui scheme-te uluk taka zirchiangin rawtnate siama sports infrastructure din chhoh mek zel a nih thu sawiin, thalaite chu a hma aia rilru neia tihtakzetna nena theihtawp chhuah turin a fuih a. Sawkarin thalaite rualawhna leh mamawhte hriain sports lama midangte elphak mai bakah hriselna tha an neih theih nan hma a lak zel thu a sawi a. Phullem phah thar chu infiamna kawnga hmasawnna mai bakah hriselna kawnga hmasawnna tura tangkai taka hman a nih ngei a beisei thu a sawi bawk a. Phullem phah thar leh Tuipuiral Games & Sports Association Golden Jubilee lawmpuinan Mizoram State Sports Council hmingin cheng nuai khat a hlan nghal bawk.

He hun hi Pu C.Lalramliana, VCP Farkawn chuan kaihruaiin kalkhawmte lawmna thu a sawi a. Pastor Chalkhuma, Farkawn-in hunserh a hmang a. Pu Lalfamkima, JE, Mizoram States Sports Council-in technical report a pe a. Pu H.Zothansanga, PS to Sports Minister leh Pu Vanlallianzuala, President, Tuipuiral Games & Sports Association-te hnen a?angin thusawi ngaihthlak a ni a. Pu C.Zodingliana, Tuipuiral Annual Sports Meet 2023 Organising Committee chuan lawmthu sawiin hawnna hun hman a khar a. Hemi hnu hian Khuallian Team leh Khualzahawm Team-ten phulem phah thar lawm nan exibition match an khel a ni.

Farkawn Public Playground-a phullem, Astro-turf phah hna hi Special Assistance to States for Capital Expenditure (SASCE) Scheme sum cheng nuai 450 senga puitlin a ni a. M/s Mizoram Development Agency, Aizawl leh Decor India, Guwahati-ten thawkin April ni 6, 2023 khan zawh fel a ni.

Project hnuaiah hian hna hrang hrang 4 thawh a ni a. Phullem phah chin area hi a dung metre 100 leh a vang metre 66 niin, inkhelhna tur bik rin chin hi a dung metre 94 leh a vang metre 63 a ni a. Phullem phahna atan hian 'New Technology Drain Board System' hman niin, a sir kil hnihah tui paihna tha tak siam a ni a. Artificial Grass hi ACT Global Company, USA te siam niin, Goal Post leh Net bakah Corner Flag-te pawh dah tel a ni bawk.

Playground kual chhuak hian a hungna tha tak metre 2 a sang CPVC coated goat proof fencing siam niin, metre 4 a zau main gate bakah goal post hnungah chhuahna exit gate metre 2 leh metre 1 a zau dah a ni bawk a. Field sir dawl ngheh nan leh field zauh (extend) nan lungrem hmar lamah metre 25 a sei leh chhak lamah metre 18 a sei siam a ni a; lei tawlh leh min mai thei dawl nan Toe Wall hmar lamah metre 25 a sei siam niin, chhak lamah metre 45 a sei rem a ni bawk.

East Tuipui bialtu MLA Pu Ramthanmawia chuan nizan khan Tuipuiral Annual Sports Meet 2023 hawnna leh Golden Jubilee lawmna, Farkawn Mualveng Kawna neih chu khuallian niin a hmanpui bawk a ni.