No.2697/2020-2020

Covid-19 hrileng avanga kan ramin harsatna kan tawh mek laia ei leh bar kawnga kan intodelh theihna tura hmalakna kal zelah nimin leh vawiin khan Lunglei HPC Vice Chairman Pu Lawmawma Tochhawng hovin ni hnih chhung awh Fehpui neih niin Rotlang E, Leite, Dawn leh Ralvawng khaw lo leh leipui ah te mi thahnem tak an feh chhuak.

Heng khua ah te hian kuthnathawktute lo, huan leh leipui engemawzat thlawhin an hmalaknate leh mamawh an neihte a hmunah en puiin kawng hrang hrangin ruahmanna an siam pui a, an thlai chawmna tur leitha te an sem nghal a. Tin, kuthnathawktute tana sawrkar scheme kalpui hrang hrang - SEDP Maize, HPC Iskut, NABARD Rural Godown, MIDH leh state sawrkar hmalaknaa tun hnaia thlai chi sem te a hmuna kalpui dan an enfiah bawk.

He Fehpui ah hian HPC Lunglei member-te, Lunglei DAO Pu Tlangtimawia Zote, DHO Pu L. Lalhmingmawia Pachuau, DIC Pu Laltanzuala, Sub Hqrs YMA President Pu Lalrotluanga te leh official dangte leh party hruaitute an tel a ni.

He Fehpui pual hian inkhawm tawi neih niin HPC Vice Chairman Pu Lawmawma Tochhawng chuan "Mizoram-in hripui Covid-19 kan hmachhawnna kawng a hma kan lakna hi a lawmawm takzet a. Chief Minister Pu Zoramthanga kaihhruaina hnuaia MLA tam zawkin an hlawh leh an MLA Fund te mipuite tan an theh chhuak te, Sawrkar hnathawkte leh mi inphalten mahni insengsova sum tam tak Chief Minister Relief Fund-a an han chhung lut ruih ruih te leh State Task Force kaihhruaina hnuai a mahni ngei inthap a duty thin te, thingtlang lam leh kuthnathawktuten an chawhmeh thlai chi hrang hrang phal taka an rawn pe thin te hi a lawmawm takzet a. Mahni lam hlawk lem lova hri chhia dona lam a tang tak tak te kan awm nawk bawk a. Heng inpekna hrang hrang te hi Pathian in mal a sawm a tunah chuan Mizoram chu kan ziaawm ta hret hret a nih hi", a ti a.

"Tunah chuan mitinin kan hmalam hun theuh atana kan inpuahchaha, ei leh bar a mahni chhungkaw ei tur engemaw tal kan thawh chhuah a tul ta a. Phai atanga chawk luh a lo bei tham ta a nih pawhin buai mangang lova kan awm theih nan kan chhungkaw tan mawh kan phur theuh a ni. Tu kut mah nghak lovin Mizo pa rilru 'ka dil bik lovang, an thawhchhuah ka ring bik lovang' tih kha kan put nawn leh a tul lehzual ta a ni" tiin kalkhawmte chu tan la zual sauh tur leh midangte zirtirtu ni theuh turin a fuih a. Thahnemngai taka thawk chhunzawm zel tur leh an mamawhte inthlahrung hauh lova sawrkar hnena thlen vat thin turin a sawm a ni.

Sub Hqrs YMA President Pu Lalrotluanga pawhin thu sawiin Covid-19 hrileng hian rei tak chhung kan ram economy ah nghawng ala neih zel dawn avangin mitinte leh chhungkaw tinte awmze nei tak leh inrenchem thiam taka khawsak kan zir chhoh a tul a ni tiin an sum hmuh apiang hmang zo nghal mai lova engemawzat tal khawl tha zel thin turin kalkhawmte a chah a ni.

Lunglei DAO Pu Tlangtimawia Zote chuan hah tak leh rim taka kuthnathawktute an thawhna hmun an lo, huan leh leipui hmun ngei Lunglei HPC Vice Chairman leh amah zuituten an hmuh puia, an mamawhte an rawn hriat pui chu lawmawm a tih thu sawiin ei leh bara intodelh kawngah leh kuthnathawktute dinhmun chawikang turin Agriculture Department chuan theihtawp a chhuah chhunzawm zel dawn a ni, a ti.

Lunglei DHO Pu L. Lalhmingmawia Pachuau chuan organic leitha an sem chhuah te chu tangkai taka hmang tura chahin thlai leh thei enkawl chungchangah Circle Officer leh Horticulture Department hnathawkte engtik lai pawha rawn theih an nih thu a sawi a. NABARD sum cheng nuai 100 senga sak leitha, thlai chi leh hmanrua dah thatna Rural Godown, Hrangchalkawn ami chu tun thla chhunga hman theih tura peih fel anih tur thu a sawi bawk.

Kuthnathawktute chuan HPC Vice Chairman leh amah zuitute chungah lawmthu sawiin an harsatna leh mamawhte an lo thlen a ni. HPC Lunglei, Agriculture Department leh Horticulture Department-te tangkawp hmalakna kuthnathawktute hnena thlai chi tlawm zawka (subsidized rate) April thla a pek chhuah te pawh tangkai taka an hman thu anlo thlen a ni.

SEDP-Maize Scheme kalpuina hmun te pawh tlawh niin he scheme hi 13/04/2020 khan HPC Vice Chairman-in a tlangzarh a. SEDP Maizr scheme hnuaiah hian Lunglei District chhungah vaimim chinna tur khaw 18-ah Cluster 19 ruahman niin ram zau zawng hi a zavaiin Acre 475 a ni a, kuthnathawktute mi 619 an tel a ni. Vaimim chi bakah hian tanpuina hrang hrang – Plant protection chemicals, sprayer, a pho rona leh transportation subsidy te an dawng bawk a. Cluster tinah hian Farmer Interest Group (FIG) din tawh niin FIG tinah hian Maize Sheller (vaimin mal thlakna khawl) leh sawngbawlna (Post Harvest Activity) atan tanpuina Rs.10,000/- theuh ruahman a ni.